Minister Presidente a reconfirma cu scol no ta habri awe pero te Dialuna proximo

ORANJESTAD (AAN) – Den conferencia di prensa, Minister Presidente den su actualisacion tocante covid-19, tambe a elabora riba e tema di Enseñanza, ya cu pa motibo fuera di alcance, Minister Endy Croes no tabata presente.

E mandatario a splica cu gobierno a tuma e decision di atende cu enseñanza na un otro forma.

“For di aña pasa caba, mi a pidi crisis team pa pone atencion riba e sector aki y nos a dicidi cu nos ta bay warda entre ayera cu awe, pa nos tuma decisionnan basa riba data y informacionnan cu nos haya”,  e dignatario a menciona.

El a duna di conoce cu scolnan no ta habri awe, Diahuebs 6 di Januari, pero te Dialuna 10 di Januari, pues otro siman.

“Mi tin cu bisa cu esaki no ta un prolongacion di vacacion. E alumnonan lo no por ta fisicamente presente pasobra nos kier evita aglomeracion, y e muchanan ta netamente e grupo mas grandi cu no ta vacuna. E decision aki nos a tume basa riba e cantidad di casonan di diamars cu a pasa mil, y tambe informacion cu nos a haya di directivanan di scol cu varios docente, alumno y mayornan cu ta den isolacion di cuarentena y esey ta haci cu si cuminza scol mes awe, scolnan lo ta hopi bashi, of ta bay tin falta di docente, loke ta crea otro tipo di retonan na scolnan”, e mandatario a señala.

El a agrega cu pa loke ta trata docentenan, esaki ta den man di directivanan di scol, cu ta esnan cu ta dicidi riba maneho di nan personal, y cada docente mester tuma contacto cu directiva di scol pa wak cual ta su responsabilidadnan riba dia 6 y 7 di Januari.

“Importante ta pa probecha e dos dianan aki pa prepara e protocol cu ta in place, pa asina ora nos habri bek tur protocol tey. Y e proyeccion ta tambe cu pa Dialuna mayoria di esnan cu ainda ta den aislamento-cuarentena lo sali”, Prome Minister a subraya.

Minister Presidente a señala cu nan como bestuur, como gobierno, y como Crisis Team a pidi tur directiva di scol pa acumula datonan pa Diabierna, pa nan por haya esakinan y por evalua si e situacion a mehora, a keda mescos of a empeora. El a reitera cu te aworaki ta mustra cu Dialuna 10 di Januari, scol ta cuminza.

El a agrega cu tin scolnan cu a pidi pa cuminza awe, pasobra nan tin tur medida in place y tur docentenan tey tambe, y nan a haya aprobacion y pa loke ta concerni crèche, tin hopi cu ta habri caba. Y si nan tin nan medidanan di higiene in place, e ora ey nan tambe por habri libremente.

Minister Presidente tabata tin palabra di reconocimento pa tur esnan cu ta traha den enseñanza, cu den temponan hopi dificil a bira hopi creativo, y a haci hopi esfuerzo pa enseñanza por a sigui den e tempo dificil aki. “Nos a hopi agradecido pa esaki”, e dignatario a conclui.