ORANJESTAD (AAN): Kico tur ta encera ora cu un persona mester bay den cuarentena?
Esaki a wordo splica den detaye diaranson mainta durante e conferencia di prensa di Crisis Team y Gobierno unda a duna un actualisacion riba Covid-19 na Aruba.
Sharline Koolman di Crisis Team a enfatisa cu cuarentena ta 'huishouden' (el a bira den e cas). Por ehempel, si un persona ta biba na Arikok #1, na e cas ey, tur esnan cu ta biba na e adres ey y cu ta den e 'Aruba Health App' cu ta mas o menos 80 porciento di e poblacion, lo haya un informacion den nan email cu tin un persona na e adres eynan cu ta positivo y cu ta nifica cu mester bay den cuarentena.
Esey por uza tambe pa mustra e doño di trabao, cu den e cas tin un hende positivo.
Segun Koolman, a purba di agilisa e proceso aki mas cu ta posibel hunto cu Setar, pero pa motibonan tecnico esaki no a bay asina lihe. E idea ta cu e persona ta haya e email ey y a base di esey, esnan den e 'huishouden' por mustra cu tin un persona malo den e cas.
Na trabao y otro caminda e reglanan ta keda vigente. "Si bo a atene bo mes na trabao na regla di distancia, na regla di mondkapje, na tur e reglanan ey, no ta suppose di tin ningun contagio na trabao. Si nos ta sincero cu otro", a bisa.
E riesgo mas grandi ta suppose di ta na cas pasobra eynan bo ta kita e tapaboca, bo ta come y ta interactua mas cu bo famia. Si tur hende mantene e reglanan na trabao manera cu mester ta eynan no ta suppose di por haya mucho contagio, Sharline Koolman a expresa.
Na cas, e personanan cu ta biba na e adres mester keda 5 dia den cuarentena y si despues no tin ningun sintoma nan tambe por sali afo. Esey ta locual a wordo aconseha na e team di maneho y a bay di acuerdo cu esey pa no paralisa tampoco un pais.
"No ta pasobra Merca a hacie, nos a djis copy-past'e. Nos a pens'e. Nos a wak kico ta traha pa nos y kico no, cuanto dia e ta encera si of no, anto basa riba esey nos a adviseer pa bin cu e cambio aki", segun Koolman.
