Minister Presidente a describi tres capitulo di e Jaarverslag di su ministerio

ORANJESTAD (AAN) – Minister Presidente, Evelyn Wever-Croes, a trata tres capitulo di e Jaarverslag (Informe anual) di su ministerio, pa loke ta regarda aña 2021,

y el a cuminza cu Asuntonan General, cu ta uno hopi extenso, segun e mandatario a splica.

Diferente tarea y Comisionnan cu ta cay bao Asuntonan General ta wordo describi den e capitulo aki. Aki ta duna un descripcion di loke a wordo haci den cuadro di calamidadnan en general, pero Covid-19 specialmente. E ta papia tambe di e crisis migratorio di Venezuela, y su efecto riba Aruba.

“Nos ta papia akinan di e problematica di asilo tambe, cual cifranan tambe por mira akiden, cuanto nan ta. Y nos ta trata akinan e tema di crisis migratorio di Venezuela, e asistencia cu nos a haya di Hulanda, y kico nos a haci cu e fondonan di Hulanda den e crisis aki”, e dignatario a señala.

Tambe a toca e tema di comunidacion. Con su ministerio ta comunica y e intencion cu tin di bin cu un “Media Raad” cu ta un Conseho completamente den man di esnan den media, pa yuda gobierno cu conseho riba e tereno aki, pa tur hende na Aruba por haya un miho calidad di media y di prensa.

Wever-Croes a indica cu tambe ta papia e relacionnan di Reino, e Landspakket, COHO, Raft, y e cambionan cu a logra introduci durante 2021 den e negociacion y esaki ta un tema cu e lo toca dentro di algun dia den conferencia di prensa y na momento cu e bay Parlamento tambe, pa amplia riba dje.

Tambe ta referi na Eleccionnan 2021 cu e dignatario a remarca cu ta un tarea hopi importante cu ta cay bao di su ministerio, pa por coordina esaki. “Y no ta un secreto cu esaki ta e eleccionnan cu mas a wordo discuti den historia di nos pais, y tur a wordo finaliza cu decisionnan di Huez y tur ta wordo trata akinan tambe, den e jaarverslag”, e mandatario a bisa.

El a sigui cu Relacionnan Exterior, kico tur ta su maneho, con importante Colombia y Merca ta den esaki. Tambe ta elabora tocante SDG, maneho di genero; y ademas tin un capitulo di Seguridad Nacional di Aruba y kico tur a haci riba e tereno aki, y cu por ta di interes pa henter Aruba haya sa.

“Veiligheidshuid ta un plataforma unda diferente instituto social y hudicial ta traha hunto, pa yuda atende e temanan social y hudicial mas critico na Aruba. Ami ta presidi e Veiligheidshuid aki, y akinan nos ta duna tambe un recuento di e tareanan”, Minister Presidente a relata.

Tocante Raad van Ouderen tambe e mandatario ta duna un recuento di kico su ministerio a haci y despues el a traspasa esaki tambe na Minister Arends.