Minister Oduber a duna reconocimento na 18 empleado di Hilton Hotel

ORANJESTAD (AAN): Minister di Turismo Sr. Dangui Oduber tabata tin e placer y honor di por a reconoce 18 empleado di Hilton Aruba Caribbean Resort & Casino cu a cumpli 35 aña den servicio.

Esaki a sosode conhuntamente cu e General Manager Sr. Vasco Baselli  y Sr. Rene Kan representando e propietarionan.

Tabata un anochi hopi ameno cu a tuma lugar den e ballroom di Hilton.

            Na aña 1959 Aruba a haya su prome hotel di luho cu tabata Aruba Caribbean Hotel, esaki tabata e inicio di locual awe ta nos unico pilar economico. E hotel aki a sera su portanan na aña 1984, esaki tabata un periodo dificil pa hopi hende. Na aña 1986 e hotel a habri su porta atrobe e biaha aki bou di e nomber di Golden Tulip Hotel, despues esaki a bolbe cambia nomber pa Radisson Aruba Resort and Casino y awendia Hilton Aruba Caribbean Resort & Casino.

            Entre e 18 empleadonan tin un total di 630 aña di servicio combina, e tabata un momento di hopi satisfaccion pa tende e trayectoria di cada un di e 18 empleadonan aki. Conociendo ki posicion laboral nan a cuminsa 35 aña pasa y con nan a crece den e servicio di e Hotel.

            Pa traha na un solo caminda pa 35 aña ta impresionante pero pa haci esaki sin nunca meldziek ta algo extraordinario, esaki tabata e caso den 1 di personanan cu a keda reconoci diabierna pasa.

            Minister Oduber ta gradici cada un di e 18 empleadonan aki cu pa 35 aña a traha na bienestar di nos turismo, esaki ta algo di aplaudi. Nan ta un inspiracion pa nos tur pa por a dedica asina hopi aña di nan bida na nos industria turistico.