Fundacion Mi Chepa cu interesante opendag

ORANJESTAD (AAN) – Nathaly Wever, directora di Fundacion Mi Chepa, a organiza un opendag pa e pueblo di Aruba ser a conoci cu e Cas pa Nos Grandinan aki.

E cas aki ta pa cuido temporal, por ehemplo ora e famia cu ta cuida di su mayornan tin cu bay cu vacacion of bay un fiesta, pero kier laga nan mayor den un lugar sigur y cu e cuido di enfermeria necesario, por lague den man di Fundacion Mi Chepa. Tambe nan por bin pa cuido 24 ora.

Wever a comenta cu su tata mes a keda den diferente cas di cuido pa tres aña largo y ora el a fayece, e dama a haya inspiracion pa traha riba e proyecto aki, cu ta uno di innovacion.   E ora ey a converti su cas y apartamentonan cu e tabata tin, den e Fundacion.

E cas tin capacidad pa entre 35 pa 40 persona, cu un total di 13 camber cu baño. El a bisa cu e facilidad aki ta un poco mas privilegia pasobra e setting ta bunita, tin un dushi ambiente, y un team selecta na man. Actualmente e tin un personal cu ta consisti di siete hende, pero no tin e vergunning ainda y pesey no por cuminza tuma pashentnan, pero nan ta cla pa inicia.