Minister Mervin Wyatt-Ras hopi satisfecho cu ImSan a haya dos ambulance nobo:

ORANJESTAD (AAN) Minister di Salud Publico y Asunto Social, drs. Mervin Wyatt-Ras,

a expresa palabranan di pabien na e personal di Servicio di Ambulance y tambe na ImSan, den e bunita ocasion aki unda a adkiri dos ambulance nobo. E dos unidadnan aki tin bunita color, un di nan ta di un color biña masha bunita mes, y tin rose tambe.

   “Mi ta kere cu ta masha bunita tambe cu nos ta supply e pueblo p’asina nos por atende cu tur loke ta trata ambulance, den nos comunidad. Nos comunidad a crece hopi, y p’esey ta hopi importante cu bo tin mas capacidad p’asina por atende cu locual ta sosode”, e dignatario a expresa.

   El a bisa cu ora un persona ta den un emergencia pasobra algo a pas’e, e ta hopi preocupa p’e keda na bida, su famia ta preocupa y tur esnan rond di dje, y ora ambulance yega, ya nan ta alivia caba, y nan por wak cu hopi a wordo haci caba den e ambulance , pa e persona wordo estabiliza prome cu e yega hospital. E mandatario incluso ta haya cu tin hende cu ni mester bay hospital, pasobra a wordo estabiliza na cas of den e lugar mes unda e ambulance a yega.

   “Mi ta kere cu nos comunidad, cu ta hayando mas y mas malesa cronico, tambe malesanan cu ta rekeri pa e persona haya un acogida mesora, e ta di importancia cu bo tin un bon cuerpo di ambulance y esaki a agrega dos pero naturalmente, nos comunidad mester haya un par mas, pero esaki segun tempo”, e mandatario a indica.

   Minister Wyatt-Ras a agrega cu ImSan na e momentonan aki tin e acreditacion di JCI (Joint Commission International) y esey nan ta orguyoso di dje, y tambe e ta duna un bon servicio. “Hopi hende ta contento cu e servicio cu ImSan ta duna, aworaki e tin e servicio di Specialista di Wowo. Poli cu, naturalmente tin falta di capacidad si wak bon, pero toch na momento cu e persona haya e cuido, e ta un cuido cualitativo. Kiermen, e cultura cu tin akinan na San Nicolas, ta un cultura hopi positivo, hopi bunita, si tur esnan cu ta atende y duna e servicio”, Minister di Salud a subraya.

   El a agrega cu esey ta haci cu ImSan tin su nomber y ta keda cu ne, cu su color local, y ta duna e servicio manera mester ta.