ORANJESTAD (AAN): Minister di Cultura, Xiomara Maduro a bishita Atelier 89 Punto di Beyas Arte Aruba pa mira e resultado di e tayer di video experimental 'Equivocal' duna pa e artista Silvia Martes.
Pa 4 siman largo e hobennan a haya oportunidad di siña con pa traha script, filma y edita nan propio pelicula cortico y diabierna anochi nan a presenta e resultado na e publico presente.
Na final di e presentacion, Minister Maduro a haya un recorido y splicacion di Sr. Elvis Lopez di e obranan di arte cu por ser admira den e studionan di Atelier 89. Ta trata di obranan cu a keda traha durante di e diferente tayernan cu ta wordo ofreci pa Atelier 89. Un exposicion bunita cu ta bale la pena pa pasa bishita y admira.
Minister Maduro ta felicita tur hoben artista cu a presenta nan bunita creacion di arte audio-visual den e presentacion 'Equivocal' y ta gradici Sra. Silvia Martes pa a amplia e conocemento y inspira nos hobennan pa sigui desaroya nan talento y creatividad.
Masha danki tambe na Elvis Lopez y e team dinamico di Atelier 89 pa e esfuerso continuo pa duna arte su atencion debido y lugar mereci den nos comunidad. Sigur un bunita anochi yena cu e talento di nos hobennan bou auspicio di e artista Elvis Lopez.
