Fundacion Respeta Mi a lansa video cu enfoke riba e tema 'testigo di violencia relacional

Micheline Mathurin ta splica:

ORANJESTAD (AAN):  Fundacion Respeta Mi a convoca un conferencia di prensa unda ademas di introduci nan logo y nan lema nobo, nan a referi na otro desaroyonan.

Micheline Mathurin, Bureau Medewerker, a duna di conoce mas detaye riba e video cu nan a lansa cu enfoke riba testigo di violencia relacional.

El a splica cu anualmente e fundacion ta traha c'un tema. Pa di dos aña consecutivo caba nan ta lansando e tema testigo di violencia relacional pasobra kier para keto na dje un rato y menciona cu esaki ta un forma cu hopi biaha ta wordo laga afo.

Tin e tendencia di enfoca riba abuso sexual, pero tambe tin otro formanan di abuso cu mester para keto na dje, a remarca, pa asina educa comunidad.

E spot a wordo lansa riba e facebook di Fundacion Respeta Mi. Den e spot ta pone enfasis riba problema entre mayornan, bringamento caminda e mucha ta scucha y ta wak tur cos.

E aña aki a scoge concientemente pa pone enfoke riba e problema. Den transcurso di e lunanan nan lo enfoca tambe riba tips y hermentnan riba con pa evita cu e tipo di abuso aki ta tuma forma na cas, Mathurin a indica.

Testigo di violencia relacional no ta solamente entre mayornan, pero e por ta tambe entre mayornan cu otro miembronan di famia. E por tuma lugar den cas of den otro ambientenan.

El a gradici CEDE Aruba, Freeway y Superfood Programs pa cu nan patrocinio.     

 Fundacion Respeta Mi henter aña ta traha tambe riba e parti di prevencion di abuso di mucha. Pa e aña aki ta bay tin mas actividad y lo keda haci esaki continuamente hunto cu comunidad, Micheline Mathurin a duna di conoce.