ORANJESTAD (AAN): Den fin di siman a bira conoci, cu e ciudadano Reuben Craigg a fayece.
E ta un persona cu pa hopi aña a ocupa puestonan clave den Setar NV y tambe tabata dado momento Director di Telearuba.
Su fayecimento riba Diabierna a afecta hopi hende cu atravez di añanan a deal cune, specificamente den area di telecomunicacion unda el a briya cu su talento, y forma di maneho. E tabata Director di Telearuba di 2010 pa 2012, y e.o. a yuda propulsa e canal local drenta den e era di High Definition.
Esnan na Telearuba a describi Reuben como un persona carismatico y firme den su maneho y conviccionnan. E ta un persona integro, husto, y cu hopi detaye.
Despues di Telearuba el a regresa pa Setar NV y a keda labora eynan te ora cu el a baha cu pensiun.
Ademas di esaki, Reuben ta ademas un Group Leader di Baden Powell Scout Group, y un di e fundadornan di Scouting Aruba Association. E ta conoci tambe como ferviente amante di deporte di Basketball.
Reuben tin 65 aña di edad. Na famia y su coleganan, DIARIO ta manda su mas profundo palabra di condolencia.
