Minister Maduro a reuni cu Economisch Bureau Amsterdam

Pa cumpli cu tema A3.1 Maneho Financiero di Landspakket --- *Lo repasa e proceso di otorgacion di subsidio

ORANJESTAD (AAN): Tur luna mas di 50 instancia ta ricibi subsidio di Gobierno pa asina nan por haci un trabou na bienestar di comunidad. Den cuadro di e reformanan proponi den e Landspakket bou tema A3.1, un investigacion mester wordo haci riba otorgacion y control riba e subsidio cu ta wordo duna pa Gobierno.

            E investigacion ta wordo haci pa sr. Koert van Buiren di Economisch Bureau di Amsterdam hunto cu su partner local sr. Franklin de Kort y ta wordo financia pa Hulanda.

            Pa cu e investigacion lo repasa e proceso di otorgacion di subsidio, e rol di e instancianan concerni y tambe con e proceso ta wordo sosteni door di e instancianan concerni.

            E investigacion aki no ta cubri e subsidio cu ta wordo duna den cuadro di enseñansa, ya cu tin un investigacion apart riba enseñansa den su totalidad.

            E resultado di e investigacion mester keda presenta pa dia 30 di juni 2022.