Minister Maduro a pidi Sinterklaas pa hiba Covid den saco

Covid ta hopi mal mucha!

ORANJESTAD (AAN)- Diadomingo despues di merdia Minister di Cultura Xiomara Maduro a yama Sinterklaas y su Pietnan bon bini na Aruba.  Pa motibo di covid no por a haci un actividad publico pa ricibi Sinterklaas.

            Nos muchanan por a mira e yegada di Sinterklaas y su Pietnan via television den un programa varia pa nos muchanan cu contamento di storia, baile, canto, traha cupcake, magia y pintura cu yen di premio cual a wordo prepara pa e comision di Fundacion Sinterklaas.

            Minister Xiomara Maduro den su discurso a pidi Sinterklaas pa hiba Covid den saco pa motibo cu covid ta hopi mal mucha y a stroba nos pais di hiba un bida normal, sano y trankil.

            Ademas e mandatario ta gradici Sinterklaas y su Pietnan, como tambe e fundacion y tur esnan cu a coopera pa e bunita programa pa ricibi Sinterklaas na Aruba.