PORT-AU-PRINCE: E banconan comercial di Haiti a cuminza traha bek normal riba Dialuna, danki na e hecho cu a cuminza cu suministro di combustible atrobe.
Esey ta loke e Asociacion Profesional di Banconan a laga sa. Nan operacion ta sigui awor, aunke tin violencia extremo den e capital di e pais, cu ta bao di control di gruponan arma.
E Asociacion a bisa cu den cuadro cu a cuminza suministra gasolin atrobe, nan miembronan a dicidi na habri porta bek cu horario normal.
Por corda cu e Asociacion a indica cu e banconan a wordo obliga na cera dia 8 di November debi na scarcedad di gasolin.
E lider di e federacion di gang G-9 y aliadonan di Haiti, Jimmy Cherizier conoci como ‘Barbecue’, a anuncia Diabierna cu a pasa cu nan lo stop cu violencia pa permiti distribucion di gasolin, pasobra e scarcedad a pone cu varios institucion a cera, incluyendo Hospital, scol, negoshi, y supermarket, loke a causa un aumento di prijs di productonan di prome necesidad, y a pone miles di hende keda sin cuminda.
Desde cu a asesina president Jovenel Moïse dia 7 di Juli, e situacion politico y economico na Haiti a empeora. Como cu no tabatin lider mas, e pais a degenera den un crisis di seguridad, cu matamento y secuestro tur dia tur rond di e capital. Como cinco siman caba, e gangnan di criminal a tuma control y blokea e principal centronan di distribucion di gasolin, djis pa pone presion riba Prome Ministro Ariel Henry.
E falta di combustible a pone cu mester a cera por lo menos 50 centro medico y hospital rond di henter e pais, como tambe demas servicionan publico y priva di prome necesidad.
