ORANJESTAD (AAN): Durante un conferencia di prensa diaranson mainta na Archivo Nacional Aruba a haci lansamento oficial di e campaña di conscientisacion di sclavitud na Aruba.
Minister Xiomara Maduro a duna inicio bisando cu pais Aruba tambe a conoce un historia den cual tabata tin e parti di sclavitud door cu Aruba ta forma parti di Reino Hulandes cu tabata tin su historia den cual tabata tin e negoshi di
sclavitud.
Pa locual ta aworaki, dia 1 di Juli proximo ta conmemora 160 aña di abolicion di sclavitud den Reino Hulandes. Antiyas y Surinam.
A sigui bisa cu sclavitud tabata un negoshi cu a trece hopi rikesa pa Reino Hulandes y cu esaki tambe el a trece hopi tristesa cu a keda acumula durante di e siglonan. Akinan ta caminda cu ora cu ta brinda excuus ta mira cu ta bini e necesidad tambe pa por papia riba e topico aki na Aruba.
E mandatario a splica cu ta un topico cu pa largo tempo no a biba den comunidad y ta un topico cu masha poco a wordo duna den informacion na scolnan riba dje na un manera structural.
Na bispo di 1 di Juli, pero principalmente despues di 19 di December di aña pasa cu Presidente Rutte a brinda su excuus na e paisnan den Reino y tambe Surinam pa tur locual a pasa e tempo ey pa cu e negoshi di sclavitud, Maduro a indica.
"Mirando tur loke a bin ta pasa nos a dicidi desde aña pasa, prome cu 1 di Juli caba, nos a dicidi pa asina por sinta cu instancianan aki na Aruba cu ta trata e topico aki pa asina por brinda informacion pa conscientisa nos aki na Aruba riba kico ta e pasado akinan", a expresa.
El a agrega cu ta importante pa hunto como comunidad decifra kico lo mester bin despues no solamente na e conscientisacion, pero tambe na investigacion. Kico ta e rasgonan cu ainda sclavitud tin ainda den e comunidad.
Minister Maduro a laga sa cu den cuadro di esaki a saca un video caba riba e topico aki. Pero mas cerca di e fecha a haci otro produccion cu tambe kier presenta na pueblo di Aruba. Pa yuda e mandatario den e tema aki a forma un comision 'Conscientisacion Sclavitud Aruba' cu miembronan di Ministerio di Finansas y Cultura, Ministerio di Enseñansa, Archivo Nacional y un consehero, drs. Luc Alofs, ken a haci un investigacion riba e tereno aki na Aruba.
E meta di e comision aki ta pa conscientisa comunidad tocante di e historia di abolicion di sclavitud na Aruba.
