ORANJESTAD (AAN): Den fin di siman cu a pasa, a tuma lugar pa di 5 aña e famoso "Long Table Aruba" organiza pa Wind Creek Aruba. E evento aki ta worde organiza pa recauda fondo pa diferente fundacion den necesidad, pa por sigui traha debidamente yudando asina esnan mas vulnerabel na Aruba. Un biaha mas, e evento aki tabata un exito, cu
participacion di un total di mil persona sinta na un mesa largo, y logrando asina na recauda 60 mil Dollar pa 6 diferente fundacion.
Prome Minister a expresa di ta sumamente contento di mira con e comunidad di Aruba ta uni hunto pa asina contribui na yuda esnan cu tin mas mester. E iniciativa di Wind Creek pa organiza un evento asina den un par di ora ta admirabel, mirando cu DOW ta cera e caminda 12’or di merdia dunando asina empleadonan un tempo limita pa por set up e luga. Tambe e hecho cu tur e ticketnan pa e evento a worde bendi completamente den un tempo hopi cortico, ta mustra e deseo cu comunidad tin pa yuda esnan mas den necesidad.
"Un danki na Wind Creek pa bin cu e iniciativa aki, y na tur empleado cu ta trahando na e evento aki voluntariamente pa asina yuda recauda fondo pa e fundacionnan aki. Danki na e comunidad pa contribui participando na e evento aki. Esaki ta muestra cu ora hende bin hunto, nos por logra cosnan grandi pa nos pais. E evento aki sigur ta un iniciativa cu Aruba mester ta sumamente orguyoso di dje," Prome Minister a expresa.
