Minister Herde bisando cu BESS II ta haci e ambicion energetico di Aruba bira un realidad

Warda energia via bateria

ORANJESTAD (AAN): Durante e ceremonia oficial pa marca e inicio di e proyecto Battery Energy Storage System (BESS II) di WEB Aruba, Minister di Vivienda, Infrastructura, Servicio Interno y Telecomunicacion, drs. Rene Herde, a enfatisa e importancia di e proyecto pa e futuro energetico di Aruba y pa e transicion na un sistema di energia mas sostenibel.

   Den su discurso, Minister Herde a señala cu e idea di un sistema grandi pa almacena energia ta un soño cu Aruba a papia di dje durante decada y cu awe e soño ta cuminsa bira realidad. Segun Minister Herde, BESS II lo yuda Aruba bira menos dependiente di combustibel fosil y na mesun momento, ta trece nos mas cerca di e meta pa na aña 2030 un promedio di 50% di nos necesidad anual di energia bin di fuentenan renovabel.

   E proceso di sostenibilidad a nace na 2009 durante Gabinete Mike Eman I, cu a bin cu e vision pa Aruba ta 100% sostenibel pa 2020 y pa guia esaki a bin cu e conocido Green Conference. Gabinete actual, AVP-Futuro ta sigui boga pa un Aruba mas sostenibel y ta gradici e ingenieronan di WEB pa sigui cu e vision cu a inicia na 2009.

   Pa Minister Herde, e proyecto no solamente ta importante pa e capacidad di produccion di energia, sino tambe pa e manera cu Aruba ta uza e energia cu ta disponibel. E meta di almacenamento ta pa uza e energia genera pa biento y solo na momento cu tin necesidad di dje.

   BESS II lo tin un capacidad di 35 megawatt (MW) y 70 megawatt-hour (MWh) di almacenamento. E sistema lo contribui na integra mas energia di biento y solo, alavez yuda fortalece e stabilidad di e red electrico.

   Minister Herde tambe a menciona cu e beneficionan di BESS II ta bay mas leu cu e sector energetico. Un suministro di energia confiabel ta importante pa tur famia y negoshi na Aruba y ta esencial pa e planificacion di vivienda nobo, mehoracion di facilidadnan publico y e futuro desaroyo di infrastructura.

Segun e Minister, Aruba su infrastructura mester por acompaña e ambicionnan di e isla den area di turismo, vivienda y infrastructura.

   Den e contexto aki, BESS II ta un paso importante den e direccion aki.  Minister Herde a felicita WEB, Elmar y tur e companianan di utilidad cu a yega na e momento importante aki. El a reconoce tambe e trabao persistente di e ingenieronan y administradornan di WEB Utilities y Elmar pa continuamente busca innovacion den produccion di energia, awa y servicio na comunidad.  

   Minister Herde a enfatisa cu e proyecto no ta simplemente un innovacion tecnico, ni solamente un proyecto pa logra e sistema di almacenamento mas grandi den Caribe. Segun e vision cu el a comparti durante su discurso, e meta mas grandi ta pa contribui na siguridad energetico y un futuro mas sostenibel pa Aruba.

   Cu BESS II, Aruba ta planifica pa tin e sistema di almacenamento di energia mas grandi den Caribe pa 2028. Pa Minister Herde, esaki ta un refleho di e vision y determinacion di Aruba, no obstante di ta un isla chikito, pa sigui busca manera pa logra trece solucionnan cu por mehora e calidad di bida y fortalece e futuro di nos comunidad.

   Minister Herde a expresa su gratitud na Gobierno di Hulanda pa e apoyo duna na Aruba su meta pa logra un calidad di bida mas sostenibel, specificamente pa contribui na un mix energetico mas sostenibel pa nos isla.