ORANJESTAD (AAN): E hoben pianista Mia Rose Weststrate a logra un resultado sobresaliente den su ABRSM Grade 1 Piano Examination,
obteniendo un Distincion, e categorIa di resultado mas halto cu un studiante por logra den e examen.
Mia a cuminsa cu su lesnen di piano na Allegro Piano Studio ora cu e tabata tin solamente 5 aña di edad. Desde e prome lesnan, su desaroyo musical tabata un proceso gradual di siñamento, practica y dedicacion. Awor despues di varios aña di estudio, e por celebra un logro importante: su ABRSM Grade 1 Piano Examination cu Distincion.
Mia a ricibi recientemente su certificado oficial di ABRSM, e Associated Board of the Royal Schools of Music, un organizacion internacionalmente reconoci pa su sistema di examen di musica. E certificado ta reconoce formalmente e logro di un studiante despues di un evaluacion di su conocemento, su habilidad como pianista y su desaroyo musical.
Un resultado di Distincion ta wordo otorga na studiante cu logra 130 te 150 punto den e examen. Esaki ta representa un nivel halto di preparacion, precision musical y dominio tecnico pa e nivel di e examen.
Pa Allegro Piano Studio, e logro di Mia ta un momento special y un refleho di e filosofia di e piano studio: cu educacion di musica pa mucha no ta solamente trata di siña toca e notanan, pero tambe pa desaroya disciplina, concentracion, independencia, confianza y perseverancia.
Mia su resultado tambe ta e resultado di un proceso di preparacion cu ta inclui lesnan semanal, practica regular na cas y apoyo constante di su maestro y su famia.
Johnny Croes, fundador y maestro di Allegro Piano Studio, ta expresa cu hopi orguyo e logro di su studiante: “Mi ta masha orguyoso di Mia y di e trabao cu el a pone den su preparacion. E ta hopi bunita pa mira con un mucha cu a cuminsa su biahe musical cu 5 aña di edad, ta crece poco poco den su habilidad, confianza y amor pa piano. Un logro asina ta resultado di hopi dedicacion, practica y perseverancia.”
Croes, kende tin mas di 25 aña di experiencia den enseñansa di musica na Aruba, ta considera e evaluacionnan internacional manera ABRSM como un oportunidad pa studiantenan midi nan progreso di acuerdo cu un standard musical structura.
ABRSM ta ofrece examen di musica na diferente nivel y den diferente pais, permitiendo cu studiante por sigui un trayectoria musical structura y ta ricibi reconocimiento formal pa nan logro. E examennan ta cubri aspectonan manera interpretacion, tecnica, musicalidad y comprendemento musical, dependiendo di e nivel y tipo di examen.
Pa un studiante hoben manera Mia, e certificado ta representa un paso importante den su biahe musical. Mas cu e resultado mes, e experiencia di preparacion pa un examen por siña un studiante cu un logro musical ta bira posibel mediante practica consistente, pasenshi y dedicacion.
Allegro Piano Studio ta sigui su compromiso pa ofrece educacion di piano di calidad na muchanan di Aruba, cu enfasis riba un fundeshi musical solido y un enfoke cu ta combina disciplina y cu amor pa musica. Masha pabien, Mia, cu bo logro maraviyoso aki.
