Minister Glenbert Croes ta confirma cu pronto lo inicia cu e proyecto di Eagle LNG

Reunion entre Gobierno di Aruba y Eagle LNG tabata positivo

ORANJESTAD (AAN): Diabierna ultimo, a tuma luga un reunion entre Gobierno di Aruba y Eagle LNG. Minister di Energia Glenbert Croes ta sumamente contento cu e resultado di e reunion y a expresa esaki cu hopi felicidad anunciando cu e reunion a termina, na unda cu  Gobierno hunto cu Eagle LNG a defini un "roadmap" pa cu continuacion di e proyecto.

            Minister Croes a indica cu e proyecto aki ta un logro grandi pa pais Aruba, y ta inmensamente gradici di tin no solamente e compromiso di Eagle LNG, sino tambe di Web Aruba NV y otro companianan estatal, cu ta dunando ful cooperacion pa cu realisacion di e proyecto aki.

            E inversion cu Eagle LNG ta bay haci pa logra trece gas natural na Aruba pa wordo procesa y suministra, ta uno hopi grandi.  Unabes logra esaki, e impacto riba e tarifa di awa y coriente lo ta uno significante, di cual hunto cu proteccion di e medio ambiente ta un di e metanan principal di Gobierno.

            Obviamente, e deseo di Gobierno ta pa cuminsa lo mas pronto posibel, cu e proyecto, pero esaki lo wordo defini den e proximo simannan

            Vice Presidente di Eagle LN, señor Filipe Pinto tambe a expresa di ta sumamente satisfecho cu e resultado di e reunion, y cu nan ta "looking forward" pa pronto inicia cu e proyecto aki na Aruba.