Segun director di AZV, Edwin Jacobs:
ORANJESTAD (AAN) – Director di AZV, Edwin Jacobs, den entrevista cu DIARIO a indica cu pa loke ta e aña aki, por a constata cu na Februari, e cantidad di sesionnan cu Fisioterapistanan a declara na AZV tabata tin un peak, pero e ultimo dos lunanan e ta bahando.
“Pues, e ta mustra cu e fisioterapistanan no ta declarando e sesionnan manera nos a wak den comienzo di aña. Nos tin cu sinta cu otro pa wak kico ta pasando cu no ta declarando e cantidad di sesionnan aki. Esey por ta un indicacion cu si bo no ta produci mi hopi, e ta nifica cu bo por causa lista di spera”, Edwin Jacobs a señala.
El a agrega cu den AZV su reunion cu e fisioterapistanan nan a indica cu nan ta sinti cu tin un lista di spera. “Nos a bisa nan cu ta importante pa nos por determina tambe e lista di spera, y nos a palabra cu nos ta bay haci un encuesta hunto cu nan, bao di nan miembronan pa nos por tin un bista mas cla di cuanto persona a yega na e fisioterapista, pero no por a haya afspraak pasobra nan ta riba lista. Di nos banda nos ta haciendo ehercicio tambe pa mira cuanto apoderacion a duna, y cuanto apoderacion tin habri ainda”, Director di AZ V a menciona.
Jacobs a sigui bisa cu den e cuadro di e fisio-document AZV ta trahando pa delinea un maneho pa futuro di e cantidad di fisioterapistanan, pero tambe ki tipo di specialismo nan kier y desea di mira tambe den e sector. “Pues, e tin nos atencion!”, Jacobs a expresa.
Director di AZV a indica cu nan no por bisa cu tin un lista di spera largo, pasobra nan no tin suficiente informacion pa bisa esey.
“E tin nos atencion si, y e aña aki nos a expande e cantidad di fisioterapista cu un, door cu a bin cu esun di mucha. Esey ta nifica cu si e muchanan tabata bay antes cerca otro fisioterapista, awendia nan por bay cerca esun di mucha loke ta crea espacio atrobe, na esnan general pa atende mas persona”, Edwin Jacobs a relata.
