ORANJESTAD (AAN): Den cuadro di 75 aña di Europees Verdrag pa Derecho Humano, Minister di Relacionnan den Reino,
Educacion, Hubentud, Innovacion y Deporte, mr. Gerlien Croes, ta pone enfoke special riba conscientisacion y educacion referente na derecho humano den sistema escolar Arubiano.
Material educativo a worde manda na tur schoolbestuurnan cu e peticion pa trata e tema di Derecho Humano den klas. E iniciativa ta busca pa fortalece e comprension di hobennan tocante nan derecho y responsabilidad como ciudadano den un sociedad democratico.
Minister Gerlien Croes ta gradici Comision di Derecho Humano di Mucha, presidi pa Sacha Geerman, y Comision di Derecho Humano, presidi pa Jocelyne Croes, directora di Departamento di Beleid & Bestuur (DBB), pa nan labor dedica den prepara e lesbriefnan aki. Danki na nan esfuerso, tanto scolnan primario como scolnan secundario lo ricibi material adapta na nivel y necesidad di e alumno y studiantenan.
Den marco di e celebracion, e siman aki Aruba lo ricibi e hues Jolien Schukking, representante di Reino Hulandes den Europees Hof voor de Rechten van de Mens. Jolien Schukking a tene un Dialuna cu a pasa un charla na Universidad di Aruba habriendo espacio pa dialogo y reflexion riba preservacion di derecho humano den Reino.
Minister Gerlien Croes a enfatisa cu e celebracion aki no ta simplemente conmemora pasado, sino ta forma parti di prepara pa futuro: “Conoce bo derecho ta base pa conoce bo bos y bo luga den comunidad. Nos ta desea cu nos hobennan crece como ciudadanonan cu ta consciente, participativo y sigur di su propio balor”.
