Un yamada pa Aruba reconoce e poder di cuido
ORANJESTAD (AAN) Awe, 29 di October ta e Dia Internacional di Cuido y Sosten, un dia cu Nacionnan Uni a dedica pa duna balor y reconoce e trabou di cuido cu ta mantene nos mundo na pia — un trabou cu hopi biaha hopi hende ta haci den silencio, sin ta wordo paga, pero ta hacie cu amor incondicional.
Aruba, cu su comunidad chikito pero fuerte, ta un ehempel bunita di kico cuido sin condicion ta. Nos grandinan, mayornan, bisiñanan, maestro, enfermeranan, y tur cu ta extende un man na un otro ser, ta contribui dia tras dia pa crea un isla di compasion. Pero hopi biaha, e trahadornan aki, specialmente e hende muhe, cu ta combina trabou, cas, yiunan y famia, ta keda sin reconocimento.
Segun e Organisacion Mundial di Salud (World Health Organization (WHO), na mundo mas di 70% di trabounan di cuido sin pago, ta ser haci pa hende muhe. E mesun realidad aki por mira tambe na Aruba. Dia Internacional di Cuido y Sosten ta un oportunidad pa nos refleha riba esaki, pa reconoce cu cuido no ta un tarea solamente pa un persona, sino un responsabilidad di henter un comunidad.
Cuido ta mas cu haci limpi, wak pa mucha, of yuda un hende grandi. Cuido ta inclui e manera cu nos ta trata otro. E ta nos tono di bos, nos pasenshi, nos manera di mustra respet. Den un mundo cu ta cambia hopi lihe, cuido y sosten ta bira e pilar cu ta mantene nos humanidad hunto.
Pa Aruba como un comunidad, e dia aki tin un sentimento special pasobra nos ta reconoce cuido como parti esencial di nos identidad. Pa Gobierno, e dia aki ta un yamada pa mas accion pa inverti den servicionan di cuido, pa promove reglanan di trabou mas flexibel, y pa inspira comunidad henter pa tuma responsabilidad den cuido di esnan mas cerca.
Cuido ta amor den accion. y ora nos, como pueblo, ta scoge pa cuida cu mas dedicacion y amor, Aruba ta bira un isla mas humano, mas solidario, y mas fuerte. Y esaki ta loke Dia Internacional di Cuido y Sosten ta para p’e.
