ORANJESTAD (AAN): ArtisA Gallery, e mesun grupo creativo tras di Aruba Art Fair, ta invita tur amante di arte pa un evento inspirador:
Art Auction – “Support Aruba’s Artists in Miami!”, cu lo tuma lugar dia 1 di November 2025 pa 7:00 anochi na ArtisA Gallery na San Nicolas.
E subasta di arte ta un esfuerzo di colaboracion entre ArtisA Gallery y Aruba Tourism Authority (ATA), cu e meta pa yuda 9 artista talentoso di Aruba representa nos isla den e prestigioso feria internacional di arte Red Dot Miami Art Fair.
Red Dot Miami ta un di e ferianan di arte mas conoci den mundo, parti di e gran plataforma “Art Basel Week,” caminda centenares di galeria y coleccionista di arte di tur parti di mundo ta reuni pa celebra creatividad y innovacion. Participacion di Aruba den un evento asina ta un oportunidad invaluabel pa mustra nos talento local na un publico internacional y fortalece e posicion di Aruba como un destinacion cultural y creativo.
E grupo di artista cu lo representa Aruba ta consisti di Elisa Lejuez, Helena Hoes, Yahaira Maduro, Alejandra Vallejo, Jean Cherouny, Armando Goedgedrag, Paul Wong, Elvis Tromp y Ryon Dijkhoff. Cada un di nan ta trece nan propio estilo, mensahe y energia cu ta refleha e diversidad y creatividad di nos isla. Nan obra ta conta historia di identidad, resiliencia y inspiracion, y lo representa un Aruba vibrante y autentico na Miami.
“Nos a logra un bon comienzo cu e apoyo di ATA, pero pa cubri gasto esencial manera transportacion, boleto di avion y hospedahe, nos mester e apoyo di comunidad,” ta bisa e director di ArtisA, Tito Bolivar. “E logro di nos artista ta e refleho di un comunidad cu ta kere den nan, cu ta stimula arte y cu ta contribui pa un futuro culturalmente fuerte.”
E evento ta habri pa publico cu un donacion di entrada di cincuenta dollar, y esunnan cu no por asisti personalmente, por sigui contribui via donacion. Donacion local por worde haci na CMB Bank, account number 65013700, na nomber di Pure Aruba Events Foundation. Donacion internacional por worde haci online na e website aki:
Tur oferta, tur donacion, ta un paso pa eleva e nomber di Aruba den mundo di arte. ArtisA ta invita tur hende pa uni den e movemento aki y contribui pa purba Aruba na Miami. Laga nos mustra cu Aruba tin talento pa briya riba cualkier podio internacional.
