Minister Gerlien Croes a habri sesionnan di trabao di cuater dia cu TWO Hulanda

ORANJESTAD (AAN):  Dialuna mainta Minister di Relacionnan di Reino, Enseñansa, Hubentud, Innovacion y Deporte, mr. Gerlien Croes,

a inicia e sesionnan di trabao di cuater dia cu representantenan di e "Tijdelijke Werkorganisatie" (TWO) di Hulanda y Aruba. E sesionnan ta un fase importante den e cooperacion pa cu e "Landspakket" pa Aruba y ta enfoca riba implementacion di reforma y fortalecimento adicional.

            E sesionnan ta tuma luga den cuadro di e "Onderlinge Regeling Samenwerking bij Hervormingen", den cual e Landspakket ta basa y cu ta keda vigente te april 2027. Segun Minister Croes, Aruba ta den un fase crucial, unda enfoke y determinacion ta necesario pa realisa accionnan acorda.

            E reunion a habri den un ambiente agradabel den cual Minister Croes a duna un bonbini na e coordinadornan, lider di proyecto y asesornan. Den su discurso di apertura, Minister Croes a enfatisa riba e importancia di e sesionnan di trabao:

            "Ta un gran placer pa mi, pa por ricibi boso aki awe. E cooperacion cu TWO a demostra di tin balor grandi durante e añanan cu a pasa y a sirbi como un catalisado pa inversion, reforma y proyectonan  importante pa Aruba", Minister Croes a bisa. "E periodo nos dilanti ta exigi implementacion. Nos ta den un sprint final unda nos esfuersonan conhunto mester ta enfoca riba realisa y fortalece locual ta planifica".

            Durante e sesionnan e dianan venidero, lo discuti e prioridadnan recien acorda cu e ministernan nobo relaciona cu e diferente temanan di e Landspakket. Hunto lo evalua unda apoyo adicional ta necesario pa logra e obhetivonan den e tempo stipula. Minister Croes a expresa su aprecio pa e compromiso di tur participante:

            "Bo dedicacion, experencia y perseverancia ta haci e diferencia. Sigui traha cu mesun energia, cooperacion y compromiso pa realisa e ambicionnan cu nos a expresa hunto".

            E speransa ta cu e sesionnan di trabao lo contribui na un implementacion mas efectivo cu enfoke riba un Aruba sostenibel y prepara pa futuro.