ORANJESTAD (AAN): Minister di Educacion, mr. Gerlien Croes, tabata presente den e celebracion di 80 aña di Aruba Trade and Industry Association (ATIA),
compartiendo su felicidad y aprecio na e organisacion cu a yuda forma panorama economico di Aruba pa ocho decada.
Minister Croes kier enfatisa e conexion importante entre educacion y desaroyo economico, stimulando un cooperacion mas fuerte entre educacion y comercio na Aruba. Prosperidad di nos isla no ta depende solamente riba turismo, economia di conocemento y innovacion sostenibel, pero ta depende tambe riba e hende cu ta drenta den e motor economico. Esaki ta cuminsa cu un sistema di educacion structura, relevante y fuerte.
Mester prepara hobennan pa no solamente tin e conocemento academico, pero tambe pa tin e abilidad pa pensa critico, colabora den diversidad di areanan profesional y innova cu proposito. Nos scolnan, institucionnan tecnico y universidadnan mester bira centronan di oportunidad y innovacion, alimentando directamente e crecemento di nos economia.
Un danki na e invitadonan special, tanto local y internacional, cu a comparti nan experiencia, conocemento y perspectiva como orador y den e grupo di discussion forma pa profesionalnan di diferente sector. Nan aportacion a eleva e nivel di e celebracion y a inspira un dialogo constructivo riba futuro economico di Aruba.
E evento di aniversario a trece lidernan di oraganisacionnan , lidernan politico, y empresarionan hunto pa aprecia e trabou grandi cu ATIA a logra eherce pa 80 aña caba — tur cu un vision comun pa un Aruba sostenibel y prospero.
