Pa dialoga tocante desaroyo di San Nicolas
ORANJESTAD (AAN): Diabierna ultimo, Minister di Finansa, Asunto Economico y Sector Primario, mr. Geoffrey Wever, a tene un reunion constructivo cu e asociacion Sunrise City Coconut Collective (SC3), un stakeholder representativo cu un base amplio di profesionalnan hoben y personanan prominente di San Nicolas.
SC3 ta representa varios miembro di diferente industria y ta enfoca riba stimula y empodera nan comunidad cu conocemento, capacidad y acceso na oportunidadnan, instrumentonan y abilidadnan necesario pa logra prosperidad social y economico. Den e reunion, e minister y e asosiacion a intercambia varios ideanan riba desaroyo economico, social, cultural y educacional di e distrito, den un atmosfera habri y ameno.
Minister Wever a indica cu e encuentro a wordo aprecia hopi, subrayando cu e bos, e preocupacionnan y e perspectiva di stakeholdernan local ta esencial pa formula y afina maneho publico cu ta conecta cu e realidad di e comunidad. Segun Minister Wever, “scucha directamente for di stakeholdernan cu ta biba y traha den San Nicolas ta duna balor agrega real na nos proceso di formulacion di maneho. Esaki ta yuda nos tuma accionnan mas efectivo y duradero.”
E dos partidonan a expresa e deseo pa continua e dialogo y pa mantene un intercambio di ideanan regularmente. E minister a subraya cu e input di SC3 lo sigui wordo considera como un elemento importante den e proceso di elaboracion di maneho, specialmente den contexto di revitalisacion economico y fortalecemento social di San Nicolas.
Cu reunionnan manera esaki, Minister Wever ta confirma e compromiso di gobierno pa traha den colaboracion estrecho cu e stakeholdernan real di comunidad, cu e meta pa construi un futuro economico mas fuerte, diversifica, inclusivo y resiliente pa San Nicolas y pa Aruba den su totalidad.
