Minister Geoffrey Wever ta contento di mira e impacto positivo di proyecto “Agrifund”

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever,

ta contento di mira e impacto positivo cu e proyecto “Agrifund” tin riba e desaroyo di nos sector primario, dunando resultado concreto.

E “Agrifund” di Afl. 3 miyon, ehecuta door di Ministerio di Economia y mamneha pa Qredits Aruba a demostra cu resultado concreto su impacto directo riba productornan y agricultornan local, cu ta haya sosten financiero y guia profesional pa expande y modernisa nan operacion y produccion.

Un paso firme pa fortalece nos sector primario

E proyecto “Agrifund” ta un iniciativa conhunto entre e Ministerio di Finansa, Asunto Economico y Sector Primario y Qredits Aruba, cu tin como meta pa stimula inversion di nos productornan y agricultornan chikito y mediano den makinaria, infrastructura y metodo di produccion eficiente.

Door di e producto financiero “Agriloan”, productornan y agricultornan a logra tuma pasonan concreto pa aumenta nan capacidad productivo y haci nan operacion mas sostenibel.

“Nos prioridad ta pa fortalece e base di nos produccion local. E programa ‘Agrifund’ ta un ehempel concreto di con un vision combina cu bon colaboracion publico-priva por crea oportunidad real pa nos productor- y agricultornan y pa Aruba bira mas independiente den su suministro di alimento,” Minister Wever a expresa.

Evidencia di progreso y compromiso

Recientemente, Minister Wever y Sra. Nathaly Harms, Branch Manager di Qredits Aruba, a bishita algun di e productornan cu a participa den e programa, entre otro Pok Pok Pok Aruba, Pestana Ranch, Watapana Farm y Cluck Eggs and Poultry Supply.

Durante e bishita, e productornan a mustra e progreso y resultado di e inversionnan implementa den nan empresa, demostrando con acceso na recurso financiero por cambia positivamente nan capacidad productivo.

“E programa ‘Agrifund’ ta mustra con, door di acceso husto na credito y guía profesional, nos por crea un cambio structural den sector primario,” segun Minister Wever.

Financiamento accesibel pa crecemento sostenibel

Pa empresarionan di sector primario cu ta difícil pa ricibi un prestamo for di un banco, minister Wever hunto cu Qredits a crea pa prome biaha un “Agrifund” di 3 miyon florin. Prestamonan (“Agriloan”) lo wordo financia cu e fondo aki. E producto “Agriloan” ta un prestamo te cu Afl. 200.000, diseña pa empresarionan nobo y existente den sector primario, cu un interes reduci di 2%. 

“Nos ta sigui crea un ecosistema den cual e sector primario ta bira un fuente di innovacion, empleo y orguyo nacional. E programa ‘Agrifund’ ta conecta directamente cu e meta di Gabinete AVP-FUTURO, pa un economia mas diversifica y sostenibel”, segun Minister Wever.

Yamada pa aplica

Ministerio di Finansa, Asunto Economico y Sector Primario, hunto cu Qredits Aruba, ta invita tur persona activo den sector primario, productornan y agricultornan chikito y mediano cu tin deseo di inverti of expande nan negoshi, pa aplica prome cu fin di 2025, mirando cu ainda tin mas o menos Afl. 1 miyon cu por wordo duna na prestamo. Minister Wever: “No perde e oportunidad aki”.