Minister Geoffrey Wever ta anuncia 'Qreative Business Academy' pa e industria creativo

*Tin un 'Creative Entrepreneurship Fund' den preparacion

ORANJESTAD (AAN0:  Durante e Creative Conference Minister Geoffrey Wever a elabora riba e importancia di talento creativo como negoshi den desaroyo economico di Aruba. E conferencia organisa pa Fundacion GoCultura ta subraya e importancia di e industria creativo como un pilar economico. Vision y maneho economico di ministerio di Asuntonan Economico tin como prioridad crea mas sectornan economico. Pa pusha e desaroyo comercial di talento creativo Minister Geoffrey Wever a elabora riba e maneho pa cu esaki cu ya ta den ehecucion.

            Desde 29 di augustus 2023 cu riba peticion di minister Geoffrey Wever Conseho di Minister a duna aprobacion di e nota di maneho “Development of the Orange Economy in San Nicolas, esaki ta den ehecucion. Prioridad ta banda di pusha desaroyo di San Nicolas como e centro di e industria creativo tambe facilita e talento creativo bira comerciante.

            Durante e prome actividad den mei 2024, participantenan na e prome Orange Economy Symposium na San Nicolas a duna diferente recomendacionnan cu lo por contribui na e desaroyo di e industria creativo. Basa riba e input balioso ricibi di tur participante, minister Geoffrey Wever a anuncia cu hunto cu Qredits Aruba lo bay ofrece e Qreative Business Academy pa duna e comerciante creativo e guia con pa habri y expande un negoshi. Adicionalmente Departamento di Asuntonan Economico lo continua cu ofrece e Creative Entrepreneur Workshops como parti di e maneho economico.

            Banda di e Qreative Business Academy, tin un Creative Entrepreneurship Fund den preparacion. E fondo aki lo bay brinda prestamo na interes reduci na empresarionan den e sector creativo, mirando cu financiamento ta un punto hopi importante cu a resalta durante e symposium. Esaki lo keda como un punto di ehecucion cu lo mester wordo realisa den un proximo gabinete.

            "Crea sectornan economico of diversifica nos economia ta tuma su tempo y preparacion. Creatividad como producto, como negoshi ta e fundamento pa pusha e industria creativo como otro pilar importante di nos economia", minister Geoffrey Wever ta expresa.

            Minister Wever ta gradici e Fundacion GoCultura y talentonan creativo presente pa nan aporte na e dialogo continuo pa pusha e desaroyo di e industria creativo. Tambe un palabra di danki ta bay pa Qredits Aruba pa e bon cooperacion di semper.