Minister Geoffrey Wever satisfecho cu e trabou haci door di Huurcommissie

ORANJESTAD (AAN):  Diaranson miembronan y secretario di Huurcommissie a presenta nan cuenta anual di 2024 na minister Geoffrey Wever.

For di e documento  a sobresali cu na 2024 Huurcommissie a trata 296 caso na un manera eficiente y rapido. Ta di remarca cu un caso na Huurcommissie ta dura apenas 6 siman y no tin costo pa e partidonan concerni. 

Huurcommissie moderno y profesional

Desde 2021 minister Geoffrey Wever a bin cu e plan pa modernisa y profesionalisa Huurcommissie. E tempo ey a encontra un organisacion cu hopi retraso y cu falta di atencion pa por sirbi pueblo na un manera adecuado.

Den e cuadro aki a cambia e ley pa mehoracion di e funcionamento di Huurcommissie, a implementa un descripcion di funcion pa e miembronan y secretaris nobo. Asina por a busca miembronan nobo na un manera habri y transparente.

Cu ayudo externo a logra recupera e retraso di tur e casonan pendiente na Huurcommissie. Tambe a inverti den e organisacion pa por a mehora e procesonan interno door di traha formatonan y modelonan standarisa y instruccion di trabou. Esaki ta pa garantisa e stabilidad, transparencia y eficiencia di Huurcommissie pa sigura cu e proceso legal y regulacion relaciona cu huur ta ser maneha na un manera husto y efectivo. 

Huurcommissie mas acesibel

            Awendia Huurcommissie ta situa den centro di Oranjestad y ta un organisacion cu e ciudadano por conta riba dje. Minister Wever kier a gradici e presidente dinamico di Huurcommissie, Monica Kock, hunto cu e miembronan di Huurcommissie, e secretario di Huurcommissie y SEDECO pa tur e bon trabou nan desplega.