Cu exito Aruba Bank a conclui ‘Battle of the Banks’ celebrando 100 aña cu e mundo bancario

ORANJESTAD (AAN): Cu exito Aruba Bank a conclui su evento deportivo “Battle of the Banks”, un celebracion special den marco di su 100 aña di existencia.

   E competencia deportivo unico, caminda tur banco local a defende su nomber den un ambiente amical, a uni empleadonan y fanaticonan pa yega hunto durante varios actividad a termina exitosamente.

   E banconan participante Caribbean Mercantile Bank, Royal Bank of Canada, Banco di Caribe, Centrale Bank van Aruba, Total Bank y Aruba Bank a midi nan forsa den Bowling, Volleyball, Bolas y Softball. Tur competencia a worde caracteriza pa fair play, team spirit y pasion pa deporte.

   A lo largo di e luna di Mei, a mira emocion y entrega na cada deporte. Di e primer bola lansa te cu e ‘home run’, Battle of the Banks a demostra kico por logra ora nos traha hunto den union y respet mutuo.

   Aruba Bank ta expresa su sincero agradecimento na tur banco participante cu a demostra nan spirito deportivo, tur empleado, famia, amigonan y fanaticonan cu a yuda crea un dushi ambiente, brinda sosten y entusiasmo.

  Battle of the Banks a sirbi no solamente pa celebra un siglo di operacion den sector bancario, pero pa honra e balornan di comunidad, colaboracion y bienestar. Nan ta mira dilanti pa mas iniciativa cu ta uni y fortalece nos lazo den comunidad.