Minister Geoffrey Wever satisfecho cu despues di 12 aña a logra firma un CAO nobo na Post Aruba N.V.

ORANJESTAD (AAN): Despues di 12 aña Post Aruba N.V. y sindicato SEPPA a logra yega na e terminonan nobo di e acuerdo colectivo di empleo, un CAO.

   Diahuebs, 13 di maart, den presencia di e trahadonan, interim managers Señora Esther Gomes y Sr. Ramoncito Croes y hunto cu representante di sindicato SEPPA Señora Magaly Brito a firma e acuerdo colectivo di empleo aki, y asina por cuminsa un etapa nobo den Post Aruba N.V. caminda lo enfoca riba mehoracion y obtenibilidad di servicio y unda ta salvaguardia e derechonan di e empleadonan.

   "E momento aki ta uno pa celebra!" Minister Geoffrey Wever a indica di ta contento cu por yega na e terminonan cu ta ambos acceptabel pa e trahadonan y financieramente prudente pa e compania su durabilidad y sobrevivencia.

"Nos sa di e cambionan cu mester den Post Aruba N.V., nos ta compromete pa sigui traha riba e progreso necesario, pa por tin un Post Aruba N.V. resiliente riba su propio pia, y sostenibel pa e pan cu e ta provee cada trahado y nan famia."

   El a finalisa bisando: “Un danki na e interim managers, na e Raad van Commissarissen, sindicato SEPPA, y especialmente na tur e trahadonan pa tur a bini hunto pa sostene y asina logra e acuerdo colectivo aki. Nos ta mira padilanti pa un futuro mas briyante pa Post Aruba N.V., cu un rol mas prominente den Aruba su economia.”