Pasobra tin hopi noticia eyfo, pa bruha tera!
ORANJESTAD (AAN)—Edgard Vrolijk, Parlamentario di Fraccion di MEP, a hiba palabra den e conferencia di prensa Diaranzon ultimo, den cual el a repasa e procedure pa trata presupuesto.
Vrolijk a expresa cu hopi hende den e pais aki ta den un caos, y na su opinion tin hopi noticia pa bruha tera y esey ta loke ta pasando eyfo”, pero Vrolijk kier pa pueblo compronde kico ta e procesonan pa loke ta presupuesto. El a elabora riba e amienda tambe (AVP-FUTURO) y, specificamente, a toca e base huridico pa haci un peticion.
“Pasobra esey ta locual ta e esencia di e amienda y e schorsing pa loke ta e reunion di siman pasa”, e parlamentario a indica.
Pa ley e presupuesto mester a wordo entrega 1 di September di e aña aki. Den e casonan anterior nos ta mira cu el a bira un rutina di bida cu e presupuesto di aña 22, 23, 24 y 25 a wordo entrega na ora. Hasta 2025 a wordo entrega 29 di Augustus 2024. Kiermen, e tabata na ora corectamente”, Vrolijk a señala.
El a agrega cu kico a pasa ta cu durante e añanan ey gobierno a cambia locual ta trata e procesamento di documentonan, kiermen cu ora un ley drenta su mainta siguiente e ya ta riba roll.
“En dado momento, pa locual ta presupuesto nos a tarda dos dia pasobra esey ta un ley mas grandi, y nan mester bay ‘book’e in’ anto den e di dos dia e ta den un Comision Central (CC) cu a pasa tambe, unda cu dia 31 di Augustus ya e tabata riba roll. E ora ey nos a bay “cc” y nos a pone fecha pa entrega di verslag”, Vrolijk a indica.
El sigui bisa cu nan a haya te dia 25 di September, y na e momento ey ya a bin cambio di presidencia, etc., etc. “Dia 4 di October, cu nan a lanta un tiki foi soño, nan a atende cu e verslag, cu na e momento ey a bay pa gobierno”, e parlamentario a señala.
El a bisa tambe cu den e maneho bieu a bin cambio, pasobra e personal di DWJZ (Directie Wetgeving en Juridische Zaken) tabata haya tur e mil preguntanan ey gewoon riba “hard copy” y nan mester a type tur. Bao Vrolijk su maneho a haci cu nan por bay den word tambe, y haci e proceso aki mas eficiente, y e ta keda cla mas lihe tambe.
