Segun Gilbert Dirks, lider di UEA:
ORANJESTAD (AAN) – E presidente di Union di Electricista Arubiano (UEA), señor Gilbert Dirks, a duna di conoce cu e sindicato tambe a tuma nota di locual Minister Geoffrey Wever a publica y e ultimatum cu el a pone.
“Awo, mi no sa for di ki dia e ta minister di utilities, cu mi sa e ta minister di economia, anto mi ta kere cu nan ta un poco bruha eyden of nan ta lubida hopi den Ministerraad”, Dirks a remarca.
E lider sindical a señala cu na Augustus ta WEB a bin afo pa pidi aumento (di tarifa) di tanto awa como coriente. No ta NV ELMAR!
El a splica cu tempo cu ELMAR a pidi pa aumento di prijs di coriente, pa e por cubri su gastonan y haci e inversionnan cu e tin cu haci, ta tempo cu Robert Henriquez tabata director di e compania.
“Djeynan te awe ELMAR mes nunca a bin pidi gobierno pa hisa prijs di coriente mas. Kiermen, mi ta kere cu Geoffrey Wever tin cu cuminza na sali bay WEB, pidi nan pa baha bek locual cu nan a hisa”, Dirks a expresa.
El a reitera cu ta Aruba WEB NV, a pidi aumento di tarifa pa e produccion y eynan ELMAR a cay aden cu mester hisa algun cen riba locual e ta cobra caba, pa por haya “break even” (cubri e gastonan) y entrega WEB e parti di ganashi cu e tin cu entrega.
E ta puntra Minister Wever di con e no ta sali awo bay WEB, duna nan un ultimatum y cuminza na regla e sistema cu nan tin di 80-20? “Podise nan por cuminza na cambi’e, y duna ELMAR un espacio, algun porcentahe mas halto, pa e por sigui sobrebibi”, segun Dirks.
