Asina Asociacion Sonrisa a observa nan di 33 aniversario

ORANJESTAD (AAN): Algun dia pasa, tabatin un celebracion y observacion importante na e sede di Sonrisa situa na Pavia.

   Esaki ta debi cu nan a cumpli nan di 33 aña di existencia.  Sonrisa a wordo funda na 1990 door di un grupo di mayornan di personanan cu dificultad mental, y el a converti su mes den e asociacion di mayornan mas grandi na Aruba.  Cada aña, e facilidad y e cuido pa personanan aki a mehora y bira mas grandi.

   E meta di Sonrisa ta pa yuda tur persona cu nan por participa den sociedad na un forma digno, mescos cu cualkier otro ciudadano na Aruba.  Sonrisa ta caracteriza pa reforza capacidad di un hende.

   Durante e dia special, nan a celebra cu un brindis, pasaboca, bolo, y alavez a coba den tur e potretnan pa mustra e historia di Sonrisa, y esaki tabata algo valioso pa bolbe mira di nobo.