Ya desde 1 Maart 2023
ORANJESTAD (AAN): Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba, nan tin e siguiente pa comunica.
Durante e reunion di 16 di februari 2023, CMM a dicidi pa mantene e tasa di e reserva obligatorio na 25,5 porciento entrante 1 di maart 2023. Di e manera aki, e banconan comercial mester tene un balansa minimo na Banco Central cu ta igual na 25,5 porciento di e depositonan riba termino cortico di nan clientenan. E decision pa mantene e reserva obligatorio na 25,5 porciento ta basa riba estimacion di un caida significante den likides excesivo na januari 2023 compara cu december 2022. Banco Central lo sigui monitorea e desaroyo den likides excesivo den e siguiente lunanan y lo por dicidi di cambia e tasa di reserva obligatorio atrobe, si ta considera esaki necesario.
E CMM a considera e siguiente informacion y analisis den su deliberacion:
Reservanan internacional y oficial: E reservanan internacional, cu ta consisti di reservanan oficial di Banco Central y reservanan di divisa na e banconan comercial, a baha cu Afl. 117,3 miyon te cu 3 di februari 2023, compara cu fin di december 2022 (Grafico 1). E reservanan oficial a mengua cu Afl. 97,6 miyon, mientras cu e reservanan na banconan comercial a disminui cu Afl. 19,7 miyon. Consecuentemente, te cu 3 februari 2023, e reservanan oficial y internacional a suma Afl. 2.693,3 miyon y Afl. 3.123,9 miyon, respectivamente.
Pa sostene un nivel adecua di reservanan ta esencial pa mantene e tasa di cambio fiho entre e Florin Arubano y e Dollar Mericano. Teniendo cuenta cu esaki, reservanan internacional a keda ampliamente riba e rekisito di tres luna di pago riba e cuenta coriente di e balansa di pago den e prome luna di 2023. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assesing Reserve Adequacy’ (ARA) di e Fondo Monetario Internacional (FMI).
Inflacion: Inflacion, midi na final di luna contra e luna di e aña anterior, a resulta na 5,7 porciento den december 2022 (november 2022: 6,6) (Grafico 2). E aumento den e Indice di Prijs di Consumo (IPC) na december 2022 compara cu december 2021 tabata causa door di e crecemento den prijs di utilidad, cu a afecta e componente di ‘vivienda’ (contribuyendo cu 3,0 punto di porcentahe). Tambe e prijs di gasoline a subi, cu na su turno ta influencia e componente di ‘transporte’ (contribuyendo cu 1,5 punto di porcentahe), mientras cu prijsnan den e componente ‘cuminda y bebida no alcoholico’ tambe a aumenta (contribuyendo cu 1,5 punto di porcentahe).
E inflacion midi riba promedio di 12 luna a subi te na 5,5 porciento, compara cu 5,3 porciento na november 2022. E presion inflacionario tabata debi na e nivel eleva di prijs di petroleo riba mercadonan internacional y e aumento den prijs di awa y coriente desde augustus 2022. Ademas, Aruba a importa un gran parti di e aumentonan den prijs for di su partnernan comercial, particularmente Estados Unidos y Europa.
Mientrastanto, na december 2022, inflacion basico (excluyendo cuminda y energia) a alcansa 1,6 porciento si midi e final di respectivo luna contra e mes un luna di e aña anterior. Basa riba un promedio di e ultimo 12 lunanan, inflacion basico a yega na 2,2 porciento.
Likides excesivo na banconan comercial: E total di likides excesivo na e banconan comercial a baha di Afl. 1.320,5 miyon na december 2021 te na Afl. 819,7 miyon na december 2022 (Grafico 3). E caida den likides excesivo ta debi principalmente na e subidanan consecutivo den e tasa di reserva obligatorio durante e periodo di januari 2022 te cu juli 2022.
Ademas, estimacion preliminario di e likides excesivo na januari 2023 a indica un caida adicional di Afl. 187,1 miyon compara cu december 2022. Sinembargo, likides excesivo a permanece riba e nivel estima (+Afl. 350,0 miyon) cu e banconan comercial posibelmente ta desea di tene pa motibonan di cautela.
{gallery}Banco Central ta mantene e reserva obligatorio na 25,5 porciento{/gallery}
