Minister Geoffrey Wever a subraya e rol fundamental di cooperacion entre Aduana y e brokernan di Aruba

Durante encuentro ‘Un rato cu Douane’

ORANJESTAD (AAN):  Durante e encuentro ‘Un rato cu Douane’, organisa pa Departamento di Aduana diaranson mainta, Minister di Finansa, Asunto Economico y Sector Primario, mr. Geoffrey Wever, a subraya e rol fundamental di cooperacion entre Aduana y e brokernan di Aruba.

“E encuentro di awe ta un refleho di nos compromiso pa fortalece e laso di colaboracion, mehora comunicacion y traha riba un sistema di importacion cu ta eficiente, transparente y prepara pa desaroyonan den futuro.”

Riba un isla manera Aruba, unda un gran mayoria di e productonan cu nos ta consumi ta wordo importa, un sistema logistico eficaz ta esencial pa bienestar di nos pueblo y pa sostene nos economia. Brokernan ta fungi como e brug vital entre sector priva y publico, asegurando cu regulacion ta sigui y proceso ta flui sin obstaculo.

E mandatario ta gradici Cuerpo di Aduana y e brokernan cu tabata presente diaranson durante e encuentro pa nan participacion.