Pa informa e consumidor riba su derecho:
ORANJESTAD (AAN)— Dialuna 27 di Maart aki, e conferencia di prensa di Gobierno tabata den man di Minister Geoffrey Wever, titular di Asuntonan Economico, Comunicacion y Desaroyo Sostenible.
E dignatario a elabora riba e tema SEDECO (Departamento di Servicio na e Consumidor) cu a lanza su website, promoviendo e derecho di e consumidor.
E mandatario a anuncia e lanzamento di e website di SEDECO (na idioma Hulandes) indicando cu parti di su maneho ta pa tin un economia inclusivo.
“Un economia inclusivo ta nifica cu no solamente tin e consumidor, pero e consumidor y e comerciante, y den e parti aki mi ta kere cu tur hende mester tin participacion den nos economia. Tur hende tin derecho di bay dilanti y haya parti di nos economia y esey ta nifica tambe cu e consumidor mester sa ki su derechonan ta”, e dignatario a subraya.
E mandatario a señala cu e consumidor mester ta bon informa ora e ta cumpra un producto, of haya un servicio, y su derecho ta reclama y pa e ta critico.
“Mi ta kere cu ta importante pa duna e consumidor den e rol aki, e tools necesario; ora cu nos ta bisa cu e hende ta central, e ciudadano ora cu e ta consumidor ta central, y nos como ciudadano tin cu yude cu esey”, minister Wever a señala.
El a subraya cu hopi biaha e ciudadano no sa su derechonan, ora e cumpra un producto of haya un servicio, e no sa con pa actua si no ta conforme cu loke e ta expect. Pa tal motibo a dicidi pa traha un website completamente nobo, p’asina tur consumidor por haya miho informacion y wordo informa debidamente riba nan derechonan.
E mandatario a menciona cu e website aki a wordo traha conhuntamente cu SEDECO, reiterando cu e meta ta pa tur ciudadano sa kico su derechonan ta, unda por bay un caminda central cu e por revisa y por wak kico ley ta bisa, e ta haya ehemplonan, documentonan cu e por uza si tin un of otro conflicto, y sa con pa actua si e ta kere cu su derechonan como consumidor a wordo viola.
“Mi ta kere cu e consumidornan ta e motor di nos economia y ta hopi importante pa nan tin acceso na informacion” e minister a reitera.
E mandatario a bisa cu esaki ta parti di diferente trabaonan cu su ministerio ta haciendo pa fortifica e posicion di e consumidor, y cada ciudadano como tal.
E website ta den proceso y pronto lo cuminza cu e marketing unda continuamente e consumidor lo wordo informa basa riba videonan cu ta mustra kico ta su derechonan y con e por proteha su mes. E website ta: https://sedeco.aw/pa/home-pa/.
