E aliento di e Nota di un Primavera Financiero nobo pa Aruba
*Ministro Xiomara Maduro cu vigilancia nobo pa gastonan
*Ministro Glenbert Croes cu buskeda di entrada nobo pa Aruba
ORANJESTAD (AAN) — Ley di Contabilidad ta e ley magico cu ta dicidi kico ta pasa cu un Pueblo.
Bienestar y felicidad di un pais ta depende di e forma cu un Gobierno ta acepta e mandato cu el a ricibi di Pueblo pa traha na bienestar di e pais.
E cuadro di Leynan di Aruba, manera tanto biaha nos a splica, ta duna orden na gobernantenan con nan mester dirigi e pais pa asina logra bienestar duradero di e Pueblo.
Ley di Contabilidad, un Ley cu ta parce masha dificil, ta e ley cu ta sigura e paso importante di crea felicidad di un Pueblo of deshaci di bienestar di un Pueblo.
Ta den e Ley di Contabilidad ta wordo regla, manera semper nos a splica, con mester atende cu placa di Pueblo na un forma, cu tin placa pa garantisa gastonan cu e Pueblo mester haci pero tambe tin oportunidad pa crea reservanan necesario pa asina si algo por pasa y mester di fondo, e Pueblo no mester cay den abismo.
Siglo 21 a entrega na Aruba e prueba di loke Ley di Contabilidad ta exigi como garantia di base di un bon gobernacion.
Na Siglo 21, Aruba a wordo confronta cu diferente forma di gobernacion.
E Siglo a habri cu e recesion mundial grandi di 2008 cu a exigi pa gobernantenan actua cuidadoso cu placa di Pueblo.
Ta den e tempo aki Aruba a conoce e gobernacion cu a trapa cu dos pia riba Ley di Contabilidad y a usa placa di Aruba na un forma nunca bisto na Aruba.
E debe nacional di Aruba a manda e pais fondo y si no tabata pa Hulanda, Aruba lo a bira un republica di banana, caminda literalmente Pueblo lo mester a cultiva banana pa e come, pasobra a gasta placa cu Aruba no tabata tin, loke ta crea debe.
E resultado di debe, cu ta cu ta contra e Ley du Contabilidad pasobra e ta destrui futuro di e pais, ta e experencia amargo di Aruba cu for di 2014 a conoce intervencion Hulandes a base di Statuut cu mester a scapa Aruba.
Na 2017 pa Aruba por a sobrebibi un aire nobo mester a supla y Aruba tabata tin e suerte di tin dos experto financiero den persona di su Prome Ministro Evelyn Wever-Croes y su Ministro di Asuntonan Financiero Xiomara Maduro, cu a presenta e formulanan pa Aruba por cubri su gastonan.
Un maneho financiero responsabel ta exactamente loke ta culmina awe, na momento cu no ta un bez pa aña den un reunion di Parlamento pa trata presupuesto cu parce mas un circo cu reunion, ta atende cu e forma cu Gobierno ta gasta placa di Pueblo.
Pa DIARIO ta sumamente importante cu na e momento mundial tan dificil cu ta marca historia internacional na 2023, Ministro Xiomara Maduro ta anuncia cu e ta presenta cifranan di Aruba na inicio di 2023 y asina ta duna un bista riba e forma cu placa ta wordo gasta loke ta kibra e posibilidad pa wega politico wordo hunga cu placa di Pueblo.
Pa por tin un crecemento financiero y positivo riba tur tereno pa un Pueblo mester tin actividad economico.
E informacionnan cu ta drenta for di Europa caminda Ministro Glenbert Croes ta trata na atrae companianan di energia nobo pa Aruba, tin tur nos atencion.
Pa por sostene e sistema financiero, Aruba cu a base di energia di petroleo a conoce temponan di oro cu su refineria, sigur awor por atrae companianan di energia limpi nobo, cu na Hulanda ta progresa informacionnan cu DIARIO ta sigui di acerca ta indica.
DIARIO na e momentonan aki ta vigila tur actividad politico na un forma special na mundo y na Aruba pa asina por informa e Pueblo di Aruba, na un momento decisivo pa felicidad y bienestar di pueblonan den un mundo cu ta exigi politiconan pa stop dedica tempo na politikeria y sirbi Pueblo a base di un bon gobernacion.
