Jaxport ta hiba Aruba na e oportunidadnan grandi di su haf
*DIARIO tras di contenido di un acuerdo cu haf Mericano
*Posibilidad pa diversificacion reuni den un solo proyecto
ORANJESTAD (AAN) — Ora tira un bista den historia mundial, ta tuma nota di e realidad cu ta den turbulencia mundial, posibilidadnan nobo pa economia y asina e futuro social y financiero di paisnan ta topa.
E problemanan di Ukraine a nace na momento cu Aruba mescos cu tur pais na mundo a prepara su mes pa sali na encuentro di recuperacion di su economia, cu Covid-19 a silencia.
Pa comprende e reto grandi cu Gobierno Evelyn Wever-Croes a enfrenta na 2020, mester comprende e problema historico cu e mester a enfrenta.
E Pandemia Covid-19 no a nifica cu economia a bay atras na Aruba. Contrario na hopi otro pais na mundo, e isla Aruba na momento cu Covid-19 a bati na porta, mester a cera porta di su economia.
E resultado di Covid-19 tabata mucho mas dramatico pa Aruba, pa e simpel motibo cu turismo ta e alma economico di Aruba cu despues di e fracaso di e proyecto Citgo na cual e pais a dedica tur atencion durante un temporada sumamente importante, a dicidi pa entrada di Aruba y e Arubiano.
Paisnan cu ta produci nan propio cuminda pa medio di agricultura, no tabata tin e problema grandi di Aruba cu ta depende completamente di importacion.
Reanima economia despues di Covid-19 sin duda ta un hecho historico den historia moderno di Aruba, cu hasta den Segundo Guera Mundial sigur como teritorio liber di aliadonan, hasta posibilidadnan nobo.
Pues e tarea di Gobierno Wever-Croes pa reanima economia di Aruba, tabata algo sumamente importante y den esaki e posibilidad pa companianan stranhero economicamente fuerte reforsa Aruba, tabata sumamente importante.
E acuerdo cu Gobierno Wever-Croes a alcansa cu Eagle LNG pa un terminal di gas na Aruba den e tempo cu demanda di gas a subi a medio cu usa di petroleo a cay den proteccion di medio ambiente, a resulta di tabata un paso sumamente importante pasobra aki no ta trata solamente entrada di un compania nobo, pero entrada di un sosten pa diversificacion di economia Arubano cu ta depende di situacionnan mundial.
E guera na Ukraine a dal Aruba tambe na 2022 pero awe evidencia a wordo duna con Gobierno Wever-Croes a sigui traha y Aruba ta firma un acuerdo cu e autoridad di puerto di Jacksonville na Merca.
Jaxporta ta e compania independiente di Gobierno di Jacksonville na Florida.
Pa Pueblo di Aruba ta importante pa realisa cu Jaxport ta propietario operador di e puerto di Jacksonville y awor ta bira partner strategico pa Aruba, cu ta bolbe na e momento cu el a atrae Eagle LNG, cu ta haya oportunidad nobo.
Na un momento sumamente importante pa mundo, Aruba ta haya un aliado nobo cu ta duna Aruba oportunidad riba tanto tereno pa diversifica su economia, loke ta nifica cu ta diversifica e mercado laboral cu na diferente forma lo entrega trabou y oportunidad nobo na Pueblo di Aruba.
No mester para keto solamente na actividad di haf, pero tambe na e oportunidadnan combina di e terminal di Eagle pa entrega gas na entre otro barconan di turista pero tambe di carga cu por bini Aruba.
Na mes momento manera Gobierno di Aruba a trece dilanti, por yega na reduccion di prijsnan na Aruba cu durante inflacion pisa cu a dal mundo, a conoce aumento enorme.
DIARIO, manera semper e ta haci cu tur proyecto y tur actividad riba tur tereno cu bati na porta di Aruba, lo sigui informa Pueblo pero si mester expresa su satisfaccion enorme y aplaudi e trabou sigur di Ministro Dangui Oduber y Prome Ministro Evelyn Wever-Croes pa asina den medio di tanto scuridad mundial, Aruba por mira luz pa futuro!
