ORANJESTAD (AAN): Pa varios luna empresa estatal SETAR ta trahando riba un proyecto importante pa diversificacion di su portfolio y economia di Aruba,
pa establece un Cybersecurity Center of Excellence (CCoE) hunto cu un partner strategico y experto riba e tereno aki esta señor Paul Eelens conhunto cu un empresa hulandes.
Minister di Asuntonan Economico, Comunicacion y Desaroyo Sostenibel, Geoffrey Wever, cu ta representa Gobierno di Aruba como accionista unico di SETAR a haya un presentacion di e empresa CCoE, cu ta specialisa riba cybersecurity avansa.
"Mi ta sumamente orguyoso cu SETAR a haci e paso aki, y asina ta contribui na diversificacion di nos economia y tambe na fortifica e knowledge economy. E CCoE tin e potencial di exporta servicio den regio y nos ambicion ta pa e CCoE bira un regional player", segun Minister Wever.
E realidad di e mundo digital di awe ta cu sistemanan digital ta hunga un rol vital den nos bida diario. Nos ta depende di tecnologia pa comunicacion, eherce comercio, educacion, cuido di salud, y entretenimento, entre otro cos. Pero e dependencia aki ta haci nos vulnerabel pa atakenan cibernetico (cyber attacks), breach di datonan (data breach), y otro menasanan pa siguridad.
Mundo digital ta compleho, dinamico, y semper ta cambia. Mientras tecnologianan nobo ta surgi, tambe ta surgi reto nobo di seguridad. Hackers y criminalnan digital ta busca constantemente maneranan nobo pa explora vulnerabilidadnan den nos sistemanan digital caminda nan por infiltra. Ta horta data/informacion critico (“data breach”) of “secuestra” data/informacion critico (via “ransomware”) a traves di diferente metodo of scams.
Phishing scams, malware, DDoS y otro forma di metodonan uza pa criminalnan cibernetico ta aumentando drasticamente. E consecuencianan di e atakenan aki por ta serio, manera perdida financiero severo y daño na reputacion, tambe por ta un menasa pa seguridad nacional y hasta por ocaciona perdida di bida.
Den termino global, seguridad cibernetico ta un problema creciente y ta afecta tur tipo di organisacionan y individuonan mundialmente. Crimen cibernetico ta calcula pa ta costa e economia global mas di $1 triyon anualmente, y e cifranan aki ta spera di subi. E crecemento di conexionan den nos sistema digital, e importancia di Internet of Things (IoT), y adoptacion extenso di Cloud Computing (warda data/informacion digitalmente via internet), entre otro tendencianan, ta amplia e area di posibel atake pa criminalnan cibernetico tuma bentaha.
Seguridad cibernetico a bira prioridad pa gobiernonan, empresanan, y individuonan. E participacion di Setar NV den CCoE ta un stap importante pa proteha e “digital assets” di Aruba, incluyendo infrastructurnan IT critico di gobierno, infrastructura, y di comercio. Mester eleva urgente e nivel di seguridad pa evita infiltracion criminal, cu tur e consecuensianan posibel, manera disrupcion di sistema of perdida di dato.
