Despues di un epoca di gobernacion yena cu dinamismo
*Gerlien y Rycond cu nan propio barco of barco di turista?
*Calidad halto di informacion ta marca di exito di Evelyn
ORANJESTAD(AAN)—Falta dos aña pa Pueblo di Aruba dicidi kico e ta haci cu su futuro, cu lo ta uno completamente nobo y basa riba exigencianan firme di democracia di excelencia.
Por spera cu prome cu 2023 yega na su fin, ya e forma pa politiconan cuminsa ofrece nan mes como sirbidor na Pueblo, lo manifesta su mes na forma mas agresivo.
Sinembargo, lo tin algo sumamente importante pa politiconan tene na vista ora nan presenta nan mes pa traha na bienestar di Aruba y asina directamente pa Pueblo di Aruba.
Si tin un grupo cu por huzga calidad di gobernacion, ta e grupo cu mester hiba informacion pa Pueblo, pues e grupo cu mester carga periodismo.
Ta pa medio di periodismo, Pueblo ta wordo informa a base di informacion cu ta ricibi di gobernacion di tur ala di e Trias Politica.
Informacion na Pueblo di parti di Gobierno y Parlamento, ta depende di mundo politico. Sistemanan moderno ta wordo uza mescos cu conocemento di reglanan di bon comunicacion di parti di e ramo di Husticia.
Por nota claramente cu e calidad di informacion cu a wordo duna na Pueblo durante gobernacion di Evelyn Wever-Croes tabata na un nivel cu no tabata a base di fantasia pero tabata entrega na Pueblo e realidad cu mester a atende pero tambe e reglanan di ley cu mester a sigui den gobernacion.
Pueblo di Aruba no a wordo informa na un nivel cu lo a cualifica Pueblo como bobo durante Gobernacion Wever-Croes, pero mas bien cu un presion pa e periodista tambe capacita su mes y informa Pueblo di Aruba na e nivel cu gobernacion local y internacional ta exigi.
Esaki ta e loke a marca e exito di Prome Ministro Evelyn Wever-Croes y su team cu mester a dirigi e Gobierno cu a ricibi e macuto mas pisa di gobernacion den existencia di Aruba.
Despues di ciere di Lago, e prome gobierno di pais Aruba cu a ricibi mando di e pais como herencia di trabou di Betico Croes, por a sigui traha riba e ala nobo di economia cu ta turismo, cu a yena e buraco di Lago.
Na 1986, Aruba por a sigui sembra den e cunuco di turismo como alternativa economico, sigur despues di intervencion Hulandes den dunamento di garantia.
Na 2020 ora porta di economia di Aruba mester a wordo cera debi na Covid-19, Aruba ya tabata den estado di bancarota produci deliberadamente pa Gobierno Mike Eman cu orguyo.
E bofon di proyecto Citgo, ta historico!
Covid-19 a ataca. Aruba a sigui cana. Crisis di Petroleo a aplasta mundo cu aumento di prijs. Aruba a sigui cana. Te awe Aruba ta cana!
Enemigo of amigo, Pueblo tabata tin confiansa den Evelyn Wever-Croes y su team cu no tabata uza palabra bunita pero tabata inspira Pueblo pa sigui dilanti cu Prome Ministro Wever-Croes como ehempel pa confronta problema.
Loke por a spera basta dia a socede. Un grupo den AVP no tin confiansa mas den e grupo bieu, cu a percura pa e calamidadnan cu a suta Aruba, cu a wordo cubri cu berguensa di scandal produci pa Ministronan di AVP, cu Mike Eman te awe ta sostene.
Con Gerlien y Rycond ta bay biaha den e mundo politico den futuro? Con otro streanan menos conoci di AVP y otro partidonan, cu a bandona nan barco, kier sigui nabega?
Cada uno lo dicidi pa nan propio barco of nan lo uni? Nan lo dicidi di bira parti di barco politico di turista cu por ehempel por ta hende cu no ta kere cu hende por skirbi nan nomber si nan no a bay universidad?
Awe Aruba a ricibi informacion di recuperacion. Gobierno Wever-Croes no ta entrega na Aruba e mensahe cu na final di 2022 a wordo pronostica pa henter mundo.
E menasa di recesion pa Aruba a wordo cambia pa speransa di recuperacion economico, di trabou pa tur hende y pan den cas di tur hende.
Cu esaki tambe e normanan pa sigui goberna Aruba a wordo entrega.
Na 1983 na Hulanda un lucha di sacrificio grandi di Pueblo di Aruba a culmina ora a firma Status Aparte di Aruba.
Na 2023 Prome Ministro Evelyn Wever-Croes a confirma autonomia, Status Aparte di Aruba, cu un crecemento economico cu lo por sostene e bon calidad di bida cu democracia ta exigi.
Cifranan ta papia. E ambiente na Aruba ta papia. E optimismo di Pueblo ta papia.
Con partidonan ta prepara pa eleccion 2025? DIARIO lo vigila costa politico y e barconan y ekipo cu cual nan lo nabega.
