Mientras Aruba ta den gara di un ola di positivismo den tur sector
*Di futuro combustibel te peliger cibernitico Gobierno a traha
*Turismo ta sigui crece y ta sostene adelanto social na Aruba
ORANJESTAD(AAN)—E anuncio di Prome Ministro Wever-Croes, cu Aruba ta enfrenta futuro atrobe cu hopi optimismo y positivismo, ta confirma awe cu Gobierno dirigi pa mr. Evelyn Wever-Croes a logra cambia e peliger di un recesion, di un caida economico total, pa un crecemento economico.
Ta un crisis tras otro mundo mester a experencia for di 2020, ora ya mundo a cuminsa prepara pa despedida di petroleo pa asina atende cu e problemanan serio di cambio di clima, cu awe den un calor intenso registra na Aruba tambe, ta duna prueba di loke por spera ainda.
Pues na 2020 hasta e conferencia cumbre di salida di e epoca di petroleo mester a spera, ora Covid-19 a destrui economia mundial y a crea hamber y miseria rond mundo.
Na 2021 mundo a drenta e tempo di suspenso pa bandona e Era di Petroleo cu prijsnan cu a subi manera flie y tabata menasa futuro.
Aruba cu tabata den un crisis financiero debi na mal maneho financiero cu a culmina na 2014, atrobe tabata na careda pa mira con ta atende cu placa di Pueblo pa evita cu bida social di Pueblo lo a bira desastroso.
Guera di Ukraine a bira causante di aumento increibel di prijsnan cu como resultado inflacion total, cu a pone cu hasta na paisnan manera Hulanda, hende tabata tin miedo di cumpra y come cuminda cu por considera basico.
2023 a wordo mira como culminacion di problema economico y financiero na mundo, cu realmente conoce problema serio na paisnan caminda Gobierno a faya y no a actua manera si tabata e caso na Aruba, cu awe a bolbe na un bida di normalidad y hasta pa un grupo grandi, ta parce di a lubida e problemanan serio cu Aruba a enfrenta.
Na e momentonan aki, ora segun cifranan mundial constante cu te awe tin por ehempel Gobierno Mericano pendiente y tumando medida manera cu taza di interes riba debe pa enfrenta inflacion, Gobierno Wever-Croes ta trece palabranan di aliento pa Pueblo di Aruba, cu ta wordo informa di crecemento economico y di progreso social pa e Pueblo.
DIARIO a haci un inventario continuo di e trabou di exponentenan di Gobierno Wever-Croes y por mira claramente con cada un miembro di e team di gobernacion a atende cu problemanan riba su tereno.
E motor politico grandi di Aruba ta keda Prome Ministro Wever-Croes cu ta asombra mundo cu su actitud positivo enfrente problema cu e ta transforma den solucion.
Den Reino Hulandes sigur e nomber di Prome Ministro Evelyn Wever-Croes ta resona y Aruba ta gosa di un credibilidad y admiracion enorme.
E forma cu Aruba ta atende cu asunto di placa, di debe, di cambio di clima, di resultado di guera di Ukraine y prijsnan di flete cu ta subi, turismo, cuido medico, economia, educacion, seguridad, y asina nos por sigui, ta bini na forma concreto dilanti.
Un pais chikito di Aruba por ehempel tin un Ministro Geoffrey Wever, cu ta splica con Gobierno ta actua contra e peligro cibernetico, cu ta uno di e peligernan mas grandi cu criminalidad ta entrega na mundo ya cu metodonan moderno ta mishi cu alma di economia mundial.
Mester di accion specialisa pa enfrenta e peliger aki y e peliger cu e tin pa economia.
Awe DIARIO, sin pone un banda tur e otro esfuerzonan di tur otro Ministro na un forma ehemplar, mester acentua e accionnan di Ministro Dangui Oduber den e ultimo dianan aki.
E hecho cu turismo a crece y a surpasa e produccion prome cu Pandemia ta papia pa su mes, mientras Aruba na careda ta busca solucion pa energia limpi y un tarea enorme ta den man di Ministro Glenbert Croes, cu ta sorprende cu e firmesa di accion internacional.
Prome Ministro Evelyn Wever-Croes a mara su nomber na un Gobierno yena cu un dinamismo historico pa awe informa Aruba con e entrada actual na turismo a surpasa e entrada prome cu pandemia.
Actividad rond Aruba, ta duna indicacion cu e pais a alcansa un crecemento economico di 4.5 porciento, manera lo mester confirma.
Den tur sector ta sinti e spirito di animo y positismo cu mas actividad, mas interes di participacion tur caminda.
En conclusion mester bisa cu segundo parti di 2023, cu mester a nifica un mundo den recesion, den caida economico, a bira pa Aruba un crecemento economico cu ta nifica progreso social di tur Arubiano, manera den otro edicionnan di DIARIO lo bini dilanti!
