Minister Endy Croes ta hopi contento di mira cu deporte den e departamentonan di gobierno ta hayando su luga

ORANJESTAD (AAN):  Dia 28 y 29 di april, a tuma luga e torneo di volleyball entre departamentonan di gobierno organisa pa Commissie Korpsviering Aruba.

Minister Endy Croes a pasa pa presencia e weganan aki y duna sosten na e hungadonan.

            E ekiponan cu a bataya pa conkista e titulo di campeon di e toreno ta, entre otro, polis, ambulance, brandweer, CEA, Arumil y Pret Pakket.  

            Na club POVA tabata reina un tremendo ambiente. Sigur un iniciativa positivo pa tene e mente di e empleadonan di gobierno sano door di practica deporte.

            Minister Endy Croes a enfatisa cu e ta hopi contento di mira cu deporte den e departamentonan di gobierno ta hayando su luga.

            Concluyendo, Minister Endy Croes ta gradici Commissie Korpsviering Aruba pa e invitacion y caluroso recepcion. Alabes ta felicita Arumil, ganado di e torneo. Na di dos luga a keda e ekipo di Pret Pakket y na di tres luga e ekipo di CEA.