Minister Endy Croes a ricibi presentacion di proyecto deportivo pa San Nicolas

ORANJESTAD (AAN): Recientemente, Minister Endy Croes, Parlamentario Alvin Molina hunto cu consehero Sr. Francis Croes y Sr. Chito Geerman a reuni cu Sr. Glen Briesen, Sr. David Drozd y Sr. Alexis Krozendijk.

            Durante e encuentro, Minister Endy Croes a ricibi un presentacion amplio den 3D di un bunita proyecto pa San Nicolas. Ta trata di un proyecto deportivo cu diferente cancha pa entre otro, beach tennis, beach volleyball y 2 cancha pa beach futbol.

            Un bunita proyecto cu sigur lo atrae e hobennan di San Nicolas y bisindario pa practica deporte. Alabes un destinacion turistico pa e turistanan cu ta bishita e area Pariba di Brug, unda lo brinda nan e oportunidad pa practica sea: beach tennis, beach volleyball of beach futbol.

            Minister Endy Croes a mira e concepto y a brinda guia na e grupo di inversionista local cu ta desea di realisa e proyecto aki na San Nicolas.

            “A brinda nan informacion y e caminda cu nan mester cana y ohala cu nan por ta exitoso. Como Minister di Enseñansa y Deporte mi ta para tras di un proyecto bunita asina. Alabes ta desea nan tur clase di exito cu e proyecto aki”, Minister Endy Croes a finalisa.