Frans Ponson, Presidente di CUA:
ORANJESTAD (AAN) – Frans Ponson, presidente di Comerciantenan Uni Aruba (CUA), den entrevista cu DIARIO a elabora tambe di e beneficionan cu e aplicacion “Uber” ta trece cu ne.
“Nos ta kere cu na final di dia, e taxistanan ta bay gana mas placa, pasobra lo tin mas hende den auto, e beneficio pa e pueblo lo ta insuperable”.
Ponson ta puntra si tur taxista sa cuanto taxista ilegal tin na Aruba y cu ta hiba hende na trabao? Un hende cu ta haya flat tire ta yama Uber pa hib’e trabao. Nos tin DIDI, nos ta promove seguridad riba caminda, ora bo sali anochi dal dos drinks, pero a dal 5 of 6, si e kier yama un taxista anochi pa hib’e cas, no ta haye. “Ta tristo no? Riba un mundo den 2024. Mi mes mester por yama un hende bin busca mi hiba mi cas. Safe pa e pueblo, sin conta e turista”, Ponson a acentua.
El a agrega cu e taxista tin e opcion si core taxi gewoon, of uza e app. E vergunning ta di dje e ta. “Nos mester haya claridad pakico e t’asina un cos malo cu nan no por core Uber y core taxi. Pasobra tur dos nan por scoge. Y, gobierno ta contento. Nos por tene gobierno contento tambe, pasobra tin control y placa ta drenta caha di gobierno”, Frans Ponson a vocifera.
El a reitera cu CUA no ta compronde di con ta contra di algo asina moderno pa e pueblo; y ora nan a wak e protesta di e taxistanan cu tur nan derecho, tur gremio na Aruba tin derecho na protesta, danki Dios cu Aruba t’ainda hopi democratico, pero CUA ta lamenta si, pasobra nos tur sa cu turismo ta nos industria number uno, y nan a par’e den e protesta, aunke cada hende sa con nan kier protesta.
