Minister Endy Croes a bishita Colegio Felipe B. Tromp

En conexion cu Dia di Himno & Bandera 2022

ORANJESTAD (AAN): En conexion cu celebracion di dia Nacional e Mandatario di Enseñansa, Endy Croes ta bishitando diferente scol rond di Aruba e siman aki.

            Diamars mainta tempran e alumnonan di Colegio Felipe B. Tromp na Noord tabata warda Minister Endy Croes su presencia y cu hopi entusiasmo. Na su yegada e Mandatario a wordo ricibi pa cabesante di scol sr. Selwyn Rosenstand.

            Despues di a saluda alumnonan e Mandatario a bishita e klasnan 5 y 6 unda a duna un charla y asina transmiti e historia di nos Himno y Bandera en conexion cu celebracion di nos dia Nacional.

            ‘Ta honor pa mi por a para mainta dilanti e klasnan pa comparti e historia di nos simbolonan Nacional esta Himno y Bandera den su totalidad y inculca den e muchanan e sentimento comun di kico ta significa nos Himno y Bandera cu den e trayecto pa pa Status Aparte, Libertad di Aruba a hunga un rol hopi importante pa unifica un pueblo’, e Mandatario a expresa.

            Minster Endy Croes a sigui bisa cu e muchanan a scucha cu hopi atencion y a intercambia informacion. ‘Mi spera di e manera aki den e funcion di Minister di Enseñansa y Deporte nos por keda contribui tambe na nos pais traspasando e historia na nos muchanan cu mañan lo sirbi e pais aki.

            Sr. Rosenstand a expresa di ta sumamente contento di a ricibi bishita di e Mandatario di Enseñansa y Deporte y cu el a comparti un momento cu e alumnonan y nos ta spera di ricibi e Mandatario mas biaha na nos scol.

            Mester agrega cu Felipe B. Tromp ta scol basico cu tur yiunan di Minister Endy Croes a bishita.

            Finalisando Minister Endy Croes ta gradici e cabesante di scol sr. Selwyn Rosenstand, docentenan y specialmente e alumnonan e bunita recepcion y un mainta asina ameno. Alabes ta invita henter Aruba pa celebra 18 di maart den grandi.