PARAMARIBO: E hoben Jean-Yves B. di apenas 17 aña di edad, naci na Francia, a wordo deteni siman pasa Diahuebs na e Punto di Control na Stolkertsijver cu 4 bolita di cocaina den su poder.
Pero den su cel di prison, finalmente via natural el a saca 71 bolita yena cu cocaina for di su curpa. Esey ta loke Cuerpo Policial di Suriname a confirma riba Diaranson.
Stolkertsijver ta situa pariba di Paramaribo, y ta un pueblo net banda di e brug grandi cu ta cruza rieu Commewijne.
E mainta di su detencion, e hoben tabata sinta den un Taxi ora cu nan a yega e Punto di Control y Polis a stop nan. Polis a ripara cu e hoben a actua raro ora el a mira agentenan yegando cerca, y claramente nan a mire ta zwaai y tira algo den e Taxi. Polis a dune ordo pa baha y asina agentenan a controla e vehiculo. Aki nan a bin haya 4 bolita di cocaina cu el a zwaai y cay riba piso den e auto, banda di su maleta.
Polis a mira cu esaki ta tipo di bolita cu hende ta usa pa guli y pone nan den stoma. Asina a haya sospecho cu e hoben aki lo a guli mas di e bolitanan aki. Asina a dicidi na detene e hoben y a pase pa seccion di Narcotica Brigade, cu a haci un prueba di urina cune.
No obstante e test a bin positivo, toch e hoben di 17 aña a keda desmenti cu el a guli bolita di droga. Polis a lage encarcela den un cel cu toilet special, y bao vigilancia continuo. E chauffeur di Taxi a resulta di ta inocente y Ministerio Publico a lage liber.
Polis a bisa cu te Diamars 22 di Maart, un total di 71 bolita di cocaina a sali via e forma natural. Hunto cu e cuatro cu a ser haya abao benta den auto, el a bira pues 75 bolita cu un peso total di 740 gram. Esaki na Europa tin un balor riba caya di 30.000 Euro.
E hoben tin suerte cu ningun bolita a kibra den su stoma, manera a socede recien cu un homber di 57 aña kende a fayece na Suriname ora bolita cu cocaina a kibra den stoma.
E potret aki pa cortesia di Cuerpo Policial di Suriname.
