Minister encarga cu Naturalesa ta lanza e calendario di “Aruba Bird Calendar 2022”

ORANJESTAD (AAN): Minister Ursell Arends, responsabel pa naturalesa di Aruba ta lanza e “Aruba Bird Calendar 2022” den presencia di un variedad di organisacionnan NGO di naturalesa.

            Esaki lo ta e di 14 aña cu Aruba Bird Life Conservation ta publica e “Aruba Birdlife Calendar”.

            Un biaha mas, no menos cu 8 (ocho) fotografo di naturalesa a contribui cu nan potretnan di pahra. Nan ta, Damilice Mansur, Ross Boss Wauben, Peter Sprockel,  Michiel Oversteegen, Michael Tromp, Patrick Peña, Albert Peterson y Greg Peterson.

            E calendarionan ta obtenibel pa 10 florin (AFls.10,00) y por cumpranan na Best Deal na Paradera, Toko Dakota na Dakota, na O’Neils Carbbean Kitchen na San Nicolas y tambe na cuater diferente botica, Botica Eagle, Botica Noord, Botica Maria y Botica Sero Preto.  E ingresonan ta pa e fundacion usa pa propositonan di conservacion.

            Lanzamento di e calendario tabata na e Spaans Lagoen di Parke Nacional, un di e areanan di pahra  mas importante di Aruba. E president di e fundacion Aruba Birdlife Conservation a keda hopi contento cu e calendario nobo y hopi agradecido na tur esnan cu a duna nan contribucion.

            Un di e proyectonan cu lo destina fondo na dje lo ta e “Proyecto conservacion di Shoco”, unda lo instala neishi artificial pa mehora e posibilidad di procreacion di e Shoco di Aruba endemico cu ta core peliger di extincion.

            Na 2012 a declara e Shoco como e simbolo nacional di Aruba. No ta necesario menciona mes, segun e president di ABC, cu nos mester purba obtene tur e fondonan cu nos por pa nos evita cu algun di nos specienan ta extingui.

            Donacion ta hopi bonbini y por hasi esei na nomber di “Foundation Aruba Birdlife Conservation”, Aruba Bank N.V., riba number di cuenta no.2402860190.

Potret numero 1. Foto di esnan presente na e ocasion di lanzamento di e calender.

Potret numero 2. Minister Ursell Arends ricibiendo e calender de Greg Peterson di Aruba Birdlife Conservation.

Potret numero 3. Natasha Silva di Parke Nacional Aruba ricibiendo e calender de Greg Peterson di Aruba Birdlife Conservation.