ORANJESTAD (AAN) – Parlamentario di fraccion di MEP, Arthur Vallejo, den su calidad di presidente di e comision fiho di salud, den Parlamento,
a elabora tocante e tema di salud mental y adiccion, den conferencia di prensa di Diaranzon di e siman aki.
E parlamentario a reuni cu hopi lider hoben cu ta entusiasma pa bin haci cambio y reformanan, completamente gratuito, unda nan a haci estudionan serio, pa por establece cu por reorganiza e fondonan publico, pa por uni dos tema cu semper a wordo trata di forma separa, cualnan ta cuido mental y adiccion.
E parlamentario a menciona cu awendia, den temponan moderno, a cuminza trata e temanan aki conhuntamente, pasobra e curpa di e ser humano ta uno completo, kiermen, e no ta separa. Esaki ta hopi importante, e parlamentario a bisa, pa por uni SPD (Sociaal Psychiatrische Dienst) y FMAA (Fundacion pa Maneho di Adiccion Aruba) den cooperacion, pa por logra maneha e tema di salud mental y adiccion integralmente.
El a agrega cu esaki ta un avance hopi grandi den e area di cuido di salud mental y e parti social. Esaki ta un tema hopi positivo, e parlamentario a subraya, y aworaki e ta den man di Minister Rocco Tjon, titular di Husticia y Asuntonan di Adiccion, pa por logra implementa e futuro di salud mental y cuido di adiccion na Aruba, cu ta hopi importante.
