*Esaki pa loke ta concerni un prome permiso
ORANJESTAD (AAN)--Minister Arthur Dowers, Titular di Husticia, den entrevista cu Matutino DIARIO, a elabora riba e proceso pa un prome permiso pa imigrantenan, cu gobierno a introduci pa duna chens na personanan stranhero, cu ta na Aruba caba pero cu pa un of otro motibo no tin status legal na Aruba.
E mandatario a expresa cu e tambe ta satisfecho na e momento aki, pa loke gobierno a mira di e proceso di regularizacion.
“Nos ta bay tin otro siman un conferencia di prensa cu tur e datonan cu nos a acumula te aworaki, y mi ta haci un apelacion ya cu enberdad ta busca trahado, y nos ta aconseha cu tin hopi persona cu ta na Aruba pa basta tempo, cu no tin trabao ainda”, e mandatario a señala.
E mandatario a bisa cu e no ta mira ningun caminda aviso cu tin hende ta busca trahado, y e ta haya lo ta bon si dunadornan di trabao ta comunica cu ne, pa informa nan cu tin un proceso cu nan por duna permiso pa un aña y den e aña cu ta bin ta bay percura pa link tambe cu e dunador di trabao.
“Nos ta bay tin hende cu tin un vergunning, pero no tin doño di trabao ainda, y nos ta bay purba di bisa nan cu tin un hende mester di un trahado pa haci limpi, of pa cushina, of otro, y nos ta bay purba di pone nan den contacto”, Minister Dowers a duna di conoce.
E dignatario a indica cu e posibilidad di trabao pa hendenan di afo tey, pasobra e ley ta duna e posibilidad ey.
