Segun presidente di Aruba Shriners Club, Lito Lacle:
ORANJESTAD (AAN): E prome proyecto di Aruba Shriners Club ta e caso di Emilio van der Linden, kende na Januari cu a pasa a sufri un accidente serio mientras e tabata rumbo pa trabao riba su brommer. Segun presidente di Aruba Shriners Club, Lito Lacle, e accidente a wordo causa pa un chauffeur cu tabata bou influencia di alcohol. Como consecuencia, Emilio a wordo traslada pa Colombia, caminda nan a amputa un di su pianan.
Tres luna despues, Aruba Shriners Club a acerca su mayornan cu e posibilidad pa yuda Emilio haya un protesis na Estados Unidos. “Nos a acerca su mama y su tata y nos a bisa nan cu nos ta bezig cu un fundacion y cu nos tabata capaz di hiba Emilio Merca pa e haya un protesis,” Lacle a splica den entrevista cu DIARIO.
E club a tuma contacto cu Araba Shriners na Fort Myers, cu a acepta e caso. Segun Lacle, esaki ta un paso importante, pasobra normalmente e tipo di tratamentonan aki ta destina principalmente pa pashentnan na Merca. “Cu hopi amor nan a dicidi di tuma e proyecto aki. Awor cu nos tin contacto directo cu nan, muchanan Arubiano tambe tin oportunidad pa haya un ‘second chance’,” el a indica.
Shriners International a cubri completamente e protesis y tratamentu medico di Emilio. Aruba Shriners Club, hunto cu Araba Shriners, a encarga principalmente cu e costonan di transporte pa Emilio y un di su mayornan, ademas di otro gastonan relaciona cu e biahe.
Prome cu Emilio a ricibi su protesis, el a pasa door di un proceso completo di revalidacion y midimento pa adapta e protesis na su necesidadnan. Desde siman pasa el a cuminsa cana cu su protesis nobo.
Emilio lo regresa Aruba diahuebs 24 di september, unda e lo continua cu su revalidacion. Segun Lacle, e meta ta pa Emilio por bolbe cana normalmente y cu tempo, casi no ta ripara cu e ta uza un protesis.
Ademas, Emilio lo bira embahador di Aruba Shriners Club como e prome beneficiario di e proyecto. “Pa nos ta importante cu e bira embahador di Aruba Shriners Club. E ta e prome proyecto cu nos a trece,” Lacle a conclui.
