Minister di Turismo a bishita Job Fair cu a tuma luga pa di 3 aña consecutivo

ORANJESTAD (AAN): Minister Dangui Oduber a bishita e di tercer “Job Fair” organiza pa Aruba Food & Beverage Association.

Tabata tin 27 diferente booth dunando informacion encuanto oportunidad pa trabao. E Job Fair a resulta den un exito tremendo cual 1,500 hende a pre-registra pa e evento, mientras cu hopi mas hende a bishita durante dia spontaneamente, demostrando un gran interes pa oportunidadnan di trabao.

   E “Job Fair” a habri su portanan trempan y entre 9:00 am cu 10:00 am a ricibi specialmente hobennan, asina enfocando riba duna e hobennan informacion pa yuda cu escogencia pa nan carera den futuro. A dedica na permiti studiantenan pa haci preguntanan relevante y ricibi informacion amplio ariba varios posibilidad di carera disponibel pa despues cu nan termina nan estudio. Studiantenan di EPB Hato y San Nicolas a participa cu entusiasmo, combersando cu profesionalnan di e industria.

  Minister di Turismo y Salud Publico, durante su bishita, a enfatisa e importancia di tal eventonan pa mustra posibilidadnan di carera y asina cera e “gap” entre educacion y empleo. “E gran cantidad di hende cu a acudi na e job fair ta mustra e entusiasmo di e comunidad pa explora oportunidadnan nobo di trabao y e importancia di conecta nos hubentud cu posiblel trabaonan. E iniciativa aki ta un paso vital pa asegura cu nos futuro forsa di labor ta bon prepara y informa.” – Minister Dangui Oduber a expresa.

  E job fair a demostra e exito di nos turismo y tambe tur e cuponan di trabao cu tin actualmente na Aruba.

  E exito di e job fair di e aña aki ta subraya e necesidad continuo pa iniciativanan asina aki, apoyando tanto studiante como esnan cu ta busca algo otro den nan carera. Minister Dangui Oduber ta duna danki y un pabien na Aruba Food & Beverage Association pa organiza e evento y ta deseanan tur clase di exito pa e aña cu ta bini, y cu e evento sigui ta uno fuerte conectando personan cu ta buscando trabao, conectando hobennan cabando nan estudio cu e forsa laboral.